NU Bullpups, angat sa Ateneo

TINALO ng top seed National University ang defending champion Ateneo de Manila, 70-58, sa Game 1 para makauna sa serye ng UAAP Season 81 juniors basketball Finals nitong Lunes sa Filoil Flying V Centre sa San Juan.

Nakahugot ang Bullpups ng balanseng offensive effort sa anim nilang manlalaro sa pamumuno ni Carl Tamayo na umiskor ng 15 puntos.

Ayon kay NU coach Goldwin Monteverde, susi sa kanilang panalo ang poise nila sa second half.

“The key is our composure. We were rushing with our execution in the first half and fortunately, we were able to recover in the second half,” pahayag ni Monteverde, matapos bumangon mula sa 2530 pagkakaiwan sa first half sa pamamagitan ng 28-15 na pag outscore nila sa Blue Eaglets sa third period.

Ang panalo ang ikatlong sunod para sa Bullpups ngayong season kasunod ng pagwawalis nila dito sa nakaraang elimination.

Kumaldag din si Tamayo ng 12 rebounds, kasama si Kevin Quiambao para sa depensa ng NU kontra sa Ateneo twin tower nina Kai Sotto at Geo Chiu na nawala at nangapa sa krusyal na yugto ng laro.

Tumapos si Quiambao na may 14 puntos at 13 rebounds bukod sa pagpigil kay Sotto sa second half.

Topscorer pa rin ang 7-foot-2 na si Sotto para sa Ateneo na may 16 puntos. 15 rebounds at 5 blocks kasunod si Chiu na may 12 puntos at 11 rebounds. Marivic Awitan

Iskor:

NU (70) – Tamayo 15, Quiambao 14, Abadiano 11, Fortea 11, Gonzales 9, Felicilda 9, Torres 1, Dayrit 0, Alarcon 0, Javillonar 0, Mailim 0

ATENEO (58) – Sotto 16, Chiu 12, Fetalvero 11, De Ayre 7, Diaz 5, Padrigao 4, Espinosa 2, David 1, Jaymalin 0

QUARTER SCORES; 14-11, 25-30, 53-45, 70-58