OFW, MINO-MONITOR SA MERS
Emergency room ng Laguna hospital, isinara
Pansamatalang isinara ang emergency room ng Laguna Doctors Hospital sa Sta. Cruz, Laguna kahapon, dahil sa hinihinalang kaso ng Middle East Respiratory Syndrome (MERS).
Ayon kay Glenn Ramos, tagapagsalita ng Department of Health (DoH) Calabarzon, wala pang kumpirmasyon kung positibo nga sa nakahahawang sakit ang lalaking pasyente, 47, overseas Filipino worker (OFW) mula sa Kingdom of Saudi Arabia, at taga-Sta. Cruz, Laguna.
“Meron nagpa-check up doon na galing ng abroad sa UAE (United Arab Emirates) nagpa check up s’ya, may signs and symptoms ng MERS,” pahayag ni Ramos sa isang phone interview sa BALITA.
Nilinaw naman ng opisyal na ang temporary closure ng ER ng ospital ay para linisin ang pasilidad bilang bahagi na rin ng precautionary measure.
“Hindi naman nagsara ‘yung ospital, yung emergency room kung saan s’ya nagpacheck-up lilinisan lang nila iyon as precautionary measure,” ani Ramos.
Iginiit din niya na hindi dapat magpanic ang publiko lalo’t “suspected” pa lamang ang kaso.
Sa kaling magpositibo, ito ang unang kaso ng MERS na maitatala sa Pilipinas.
Sa panayam naman sa radyo kay DoH-Calabarzon Regional Director Eduardo Janairo, sinabi niyang under observation na rin ang pamilya at hospital staff na nagkaroon ng close contact sa pasyente.
“Under observation sila. Sila ngayon ang binabantayan in any case magkaroon sila ng pneumonia or respiratory disease ay kailangan isolate agad,” aniya.
Ikinokonsidera na, aniyang, “under control” ang sitwasyon, dahil nasa isolation na ang OFW sa Research Institute for Tropical Medicine (RITM) sa Muntinlupa City.
“Fina-follow up natin kung nakuhan na ng specimen para ma-sure natin kung sya ay MERS-CoV na sakit,” ani Janairo.
Samantala, sa isang text message, sinabi ng DoH-Central office sa Manila na bineberipika pa ng Epidemiology Bureau ang kaso.
Ayon sa DoH, ang mga pasyente na apektado ng sakit ay maaaring makaranas ng severe acute respiratory illness na may sintomas ng lagnat, ubo at hirap sa paghinga.
Nagpaalala rin ang ahensya sa publiko na agad magpakonsulta kung nakararanas ng mga sintomas, lalo na ang mga Pilipino na nagtatrabaho sa Saudi Arabia at sa mga bansa sa Middle East.