Scholarship ng estudyanteng nakiki-rally, ‘di babawiin

Malabong maglalabas si Pangulong Rodrigo Duterte ng executive order para alisan ng scholarship ang mga estudyanteng sumasali sa mga protesta laban sa pamahalaan.

Ito ipinahayag ni Presidential Spokesperson Salvador Panelo matapos sabihin ni National Youth Commission (NYC) chairperson Ronald Cardema na ang mga estudyanteng sumasali sa mga protesta laban sa estado ay dapat na tanggalan ng kanilang scholarships.

Nanawagan din si Cardema sa Pangulo na maglabas ng executive order na binabawi ang government scholarships ng lahat ng anti-state scholars, lalo na ang mga nakikipag-alyansa sa mga grupong makakaliwa.

Sa press briefing kahapon, sinabi ni Panelo na malabong susuportahan ni Duterte ang suhestiyon ng NYC chairperson na siya ring national chairman ng Duterte Youth movement.

Ayon kay Panelo, hindi maaaring basta-basta na lamang aalisin ng gobyerno ang government scholarship ng isang estudyante dahil sa pinaghihinalaang siya ay anti-government.

“Kung ire-remove mo lang nga on the basis of suspicion, I don’t think the President will sign [an executive order]. Kailangan merong grounds – legal grounds, reasonable grounds,” aniya.

Sinabi rin ng opisyal ng Palasyo na ang pagsali sa mga rally ay isang karapatan na iginagarantiya ng Constitution.

“Kung sila ay sumasama lang sa mga rally, that’s their right – that’s freedom of expression and freedom of assembly,” ani Panelo.

Gayunman, sinabi ni Panelo na maaaring tanggalin ng gobyerno ang scholarships ng mga estudyante kapag napatunayan na sila ay parte ng isang grupong kumakalaban sa pamahalaan.

“The state will protect itself from any attack, whether superficially, subliminally, or actual. Pero kailangan meron tayong ebidensiya. We are not reckless,” aniya.