Iloilo solon, sinuspinde sa graft

Iniutos ng Sandiganbayan na suspendihin ng 90 araw si Iloilo 2nd District Rep. Arcadio Gorriceta na dating alkalde ng Pavia, Iloilo, kaugnay ng kinakaharap na kasong graft.

Ang kautusang inilabas ng 4th Division ng anti-graft court nitong Enero 23 ngunit kahapon lamang isinapubliko.

"The mandatory preventive suspension under the law is to prevent further acts of malfeasance while in the office, the intimidation of witnesses, and the possibility of tampering with documentary evidence," ang bahagi ng kautusan ng korte.

Ang kaso ay nag-ugat nang labagin umano ng kongresista ang Republic Act 3019 (Anti-Graft and Corrupt Practices Act) dahil sa umano’y maanomalyang pagbibigay ng halos P1 milyong pondo sa non-government organization (NGO) na Tagipusuon Foundation, Inc. na kinakatawan nina Corazon Taladua at Timoteo Tomas Salvilla, noong 2004.

Si Gorriceta ay alkalde pa ng Pavia nang maganap ang anomaly.

Ang nasabing pondo ay bahagi ng P5 milyong Countrywide Development Fund (CDF) ni dating Iloilo Rep. Augusto Syjuco, Jr, na nakalaan para sa Education for All Program ng nabanggit na bayan.

Bukod sa nasabing mambabatas, kasama rin sa kinasuhan sina dating Iloilo Rep. Augusto Syjuco Jr., municipal accountant Eufemia Jamerlan, at municipal treasurer Edwin Elumba.

Kinasuhan din sina Taladua at Salvilla.