PSTC Act, nilagdaan ng Pangulong Duterte

MAS makasisiguro ang atletang Pinoy na makamit ang minimithing gintong medalya sa Olympics sa pagpapatayo na worldclass na pasilidad at pagkakaroon ng makabagong kagamitan.

Ayon kay Philippine Sports Commission (PSC) Chairman William ‘Butch’ Ramirez, siniguro ng Pangulong Rodrigo Duterte na makakamit ng bansa ang kauna-unahang gintong medalya sa Olympics hindi man sa kanyang administrasyon kundi sa susunod na pamahalaan matapos lagdaan para maging isang ganap na batas ang Republic Act 11214 o ang Philippine Sports Training Center (PSTC) Act.

“It’s a happy moment for Philippine sports,” pahayag ni Ramirez.

Nilagdaan ng Pangulong Duterte ang PSTCA Act nitong Pebrero 14.Nakapaloob sa batas ang pagpapatayo ng state-of-art training centers tulad ng baseball field, beach volleyball courts, bowling center, covered swimming at diving pool, football field, gymnastics center, multi-purpose gymnasium, multipurpose field, rugby pitch, skeet and trap range, softball field, track and field oval, tennis courts, velodrome, weight training building at iba pa.

Ang nasabing proyekto ay nilaaan ng P3.5 billion na magmumula sa General Appropriations Act (GAA).

“We at the PSC are extremely grateful to the President for making this historic development in Philippine sports happen. This facility can become a reality to be able to provide our athletes more fighting chance in their competitions with an upgraded training facility,” masayang pahayag ni Ramirez.

Kabuuang 20 ektarya ang lupain na gagamitin para sa pagpapatayo ng PSTC at isa sa partikular na lokasyon ay ang Rosales Pangasinan, hindi kalayuan sa Clark, Pampanga kung saan ipinatayo ng Bases Conversation Development Authority (BCDA) ang sports center at ilang pasilidad para magamit sa gaganaping 30th Southeast Asian Games sa Nobyembre.

Hindi pa malinaw kung ibibigay sa PSC o sa Philippine Olympic Committee (POC) ang pamamahala nito sa pagtatapos ng biennial meet.

Sa PSTC, sinabi ni Ramirez na personal niyang pamamahalaan ang pagpapatayo ng pasilidad.

“We will be handson in overseeing the operation and construction of the PSTC,” aniua.