DoJ: Drug lord ng Bilibid, iniimbestigahan
Nais ni Justice Secretary Menardo Guevarr na hindi lamang mapigilan kundi maparusahan din isang bagong inmate ng New Bilibid Prison (NBP) kapag napatunayan na tuloy pa rin ang illegal drugs operations nito sa labas ng pasilidad.
Naglabas na si Guevarra ng Department Order No. 093 na inaatasan ang National Bureau of Investigation (NBI) at ang Bureau of Corrections (BuCor) na imbestigahan ang Bilibid inmate na si Rustico Ygot.
Nakasaad sa kautusan ng Secretary na may petsang Marso 4 na inaataasan ang NBI at ang BuCor na magsagawa ng “investigation and case build-up” laban kay Ygot.
Sinabi rin niya sa mga imbestigador na “if evidence warrants, to file the appropriate charges against the persons found responsible therefor.”
Ibinigay ni Guevarra ang kautusan matapos diumano’y natuklasang nagpapatuloy ang illegal drugs operations ni Ygot sa Cebu.
Nitong Linggo, nagsagawa ang mga operatiba ng Cebu City Police Office (CCPO) ng dalawang anti-drug operations sa Cebu at nasamsam ang P190 milyon halaga ng methamphetamine hydrochloride o mas kilala bilang shabu.
Naaresto sa operasyon si Elymar Ancajas sa Barangay Inayawan, Cebu City at ang supplier nitong si Jocelyn Encila sa Barangay Casili, Consolacion, Northern Cebu. Inaresto rin ang mga magulang ni Jocelyn na sina Marcial at Marilyn.
Nalaman ng mga imbestigador na si Jocelyn ay tumatanggap ng instruksiyon mula kay Ygot sa pamamagitan ng Internet.
May mga nakakabit ding closed circuit television (CCTV) cameras sa kanyang bahay na direktang napapanood ni Ygot mula sa kulungan.