Aguinaldo @ 150: Selebrasyon ng kultura, kasaysayan
MASAYA at makulay na ipinagdiwang ang ika-150 kaarawan ng rebolusyonaryo at unang pangulo ng Republika ng Pilipinas, si Gen. Emilio Aguinaldo.
Daan-daang katao, bata man o matanda, na mula sa iba’t ibang lugar ang nagtipun-tipon sa makasaysayang Aguinaldo Shrine sa Kawit, Cavite, nitong Biyernes para makibahagi sa pagdiriwang.
Sa pangunguna ng National Historical Commission of the Philippines (NHCP), sinimulan ang event sa flag-raising at wreath-laying ceremony.
Dumalo sa pagtitipon si Cabinet Secretary Karlo Alexei B. Nograles, bilang panauhing pandangal at tagapagsalita, at siya ang nanguna sa mga nakiisa mula sa national, regional, provincial at local government agencies, members ng Aguinaldo clan, Independent Freemasons of the Philippines, diplomatic community at nongovernment organizations.
Sa kanyang talumpati, pinayuhan ni Nograles na huwag lamang alalahanin si Aguinaldo para sa kanyang kabayanihan at ambag sa mga Pilipino ngunit sa kanyang tagubilin na hindi matatamo ng sambayanang Pilipino ang kalayaan kung hindi tayo magkakaisa bilang iisang bansa.
Ikinumpara ni Nograles ang mga sulirain ni Aguinaldo sa ngayon ay kinakaharap ni Pangulong Rodrigo Duterte.
Aniya, ang tunay na lider ay hindi mag-iisip ng kung anuman kundi ang ikakabubuti lamang ng nasasakupan nitong mamamayan at pag-iwas sa pagdanak ng dugo.
Tinanggap ni Nograles ang Aguinaldo @ 150 commemorative coin at stamp mula kay Bangko Sentral ng Pilipinas Governor Benjamin Diokno at Philippine Postal Corp. chairman, Norman Fulgencio.
Kabilang din sa mga dumalo sina Cavite Vice Governor Ramon Jolo Revilla III, Cavite 1st District Rep. Francis Gerald A. Abaya, Kawit Mayor Angelo Emilio Aguinaldo, Bacoor City Mayor Lani Mercado Revilla, Provincial Tourism ar Cultural Affairs Office head Rozelle Sangalang, Cavite Police Director Col. William Mongas Segun, at dating prime minister Cesar Virata.
Nagpatuloy ang selebrasyon sa pagtatanghal ng “karakol” (religious dance procession) competition, na nilahukan ng iba’t ibang paaralan mula sa bayan. Ang Karakol ay isang original dance of prayer para kay Sta. Maria Magdalena, patron ng Rebolusyon at ng Kawit parish church.
Isa rin sa mga nagtanghal sa pagdiriwang na tinawag na “Sa Iyong Pagwagayway: A Celebration of History and Culture” ay ang Bayanihan, ang tanyag na national folk dance company.
Isinilang noong Marso 22, 1869, si Aguinaldo aynaging Pangulo ng bansa sa edad na 29. Ang kanyang proklamasyon ng Philippine Independence sa Kawit, Cavite noong Hunyo 12, 1898 ang naging daan para isilang ang Republika ng Pilipinas noong Enero 23, 1899.
Idineklara ng Malacañang ang Marso 22, 2019 bilang special nonworking holiday sa lalawigan ng Cavite para gunitain ang kaarawan ni Aguinaldo sa bisa ng Proclamation 694, na nilagdaan ni Executive Secretary Salvador Medialdea, sa awtorisasyon ni Pangulong Rodrigo Duterte noong March 12.