Racasa, sasabak sa Sri Lanka
TARGET na makapaguwi ng karangalan ni Philippines’ youngest Woman Fide Master Antonella Berthe “Tonelle” Murillo Racasa sa pagsabak sa Asian Youth Chess Championships sa Abril 1-10 sa Kaluthara, Sri Lanka.
Sasamahan siya ng kanyang ama at coach na si Roberto Racasa na isang International Memory Sports champion.
Nagkampeon si Racasa sa 19th ASEAN International Age Group Chess Championship na ginanap nitong Hunyo sa Davao City. Nakopo niya ang gold medal sa standard competition kasama na rin sa pagsikwat ng WFM title.
Ito ang nagbigay daan kay Tonelle para tanghaling WFM sa edad na 11.
Nagkampeon din siya sa 18th ASEAN International Age Group Chess Championship na ginanap sa Kuantan, Malaysia noong 2017 tungo sa pagkamit ng Asean Chess Master title sa edad na 10 at sa National Age Group Girls Under 10 Champion sa Cebu City sa edad na 9.
Sariwa pa si Tonelle sa pagdomina ng fifth International School Manila Chess Cup nitong Sabado sa International School Manila sa Taguig City. Nakalikom siya ng anim na puntos para pangunahan ang Home School Global Chess Team A sa pagsungkit ng over-all team championship. Ang iba pang miyembro ng Home School Global chess team ay sina Andrew James Toledo ( 5 points), Ethan Jackenzie Ang (4.5 points) at Ernest Jacoby Ang (4 points).
Naiuwi ng Home School Global chess team ang championships’ trophy sa pagkamada ng 19.5 puntos, 2.5 puntos ang bentahe sa pinakamalapit na karibal.