Ateneo netters, wagi sa NU Bulldogs
IPINALASAP ng Ateneo de Manila ang unang pagkatalo sa National University sa men’s division ng UAAP Season 81 lawn tennis tournament sa pamamagitan ng 4-1 paggapi sa Bulldogs sa Colegio de San Agustin courts sa San Jose Del Monte City sa Bulacan.
Naging konsolasyon nalamang para sa Bulldogs sa kabila ng natamong kabiguan ang pananatili nila sa pangingibabaw hawak ang barahang 9-1.
Dahil sa panalo, ang pang-anim na sunod ng Ateneo, umangat sila sa markang 8-2.
Nasa likuran naman nila at pumapangatlo ang University of Santo Tomas na tumaas sa kartadang 7-3 matapos magposte ng 4-1 panalo kontra Adamson University.
Sa isa pang laban, inungusan ng University of the Philippines,3-2 ang De La Salle para makatabla sa defending champion University of the East sa patas na barahang 5-5.
Samantala sa kababaihan, pormal namang umusad ang Lady Archers sa Finals matapos ang 4-1 paggapi sa UST Tigresses.
Dahil sa panalo, natapos na rin ang limang taong paghihintay ng La Salle na muling makabalik ng finals.
Nasa likod ng Lady Archers (6-1) ang Lady Eagles na sumalo sa Lady Bulldogs sa markang 4-3 matapos ang 3-2 panalo kontra Lady Maroons.
Natapos naman ang pagiging reigning champion ng UST sa pagbagsak nito sa ikalimang panalo kontra 2 lamang panalo habang nagtapos naman sa kartadang 2-6 ang season ng UP.