South China Sea, pag-uusapan nina Duterte at Abe
Tatalakayin ni Pangulong Rodrigo Duterte ang papel ng Asia sa sarili nitong kinabukasan sa pakikilahok niya sa 25th International Conference on the Future of Asia sa Tokyo, Japan sa susunod na linggo.
Sa pre-departure briefing para sa pagdalo ni Duterte sa Nikkei annual conference, sinabi ni Assistant Secretary Meynardo Montealegre ng Department of Foreign Affairs’s Office of Asian and Pacific Affairs, na ididiin ni Duterte ang papel ng Asia “in charting its own future, even as we affirm the larger international frameworks and mechanisms that have given birth to the Asian century we now enjoy.”
Ayon kay Montealegre, makakasama ni Duterte ang iba pang heads of states kabilang sina Prime Minister Mahathir bin Mohamad ng Malaysia, Prime Minister Sheik Hasina ng People’s Republic of Bangladesh, Prime Minister Hun Sen ng Kingdom of Cambodia, at Prime Minister Thongloun Sisoulith ng the Lao People’s Democratic Republic.
Ang 25th Nikkei Conference on the Future of Asia ngayong taon ay gaganapin sa Mayo 30-31 sa Imperial Hotel sa Tokyo. Sa ilalim ng temang “Seeking a New Global Order -Overcoming the Chaos,” magbibigay ng talumpati ang Pangulo sa Mayo 31.
MEETING KAY ABE Samantala, matapos magbigay ng talumpati, makakapulong ni Duterte sa ikapitong pagkakataon si Japanese Prime Minister Shinzo Abe simula nang siya ay maupong Pangulo noong 2016.
Ayon kay Montealegre, kabilang sa mga tatalakayin ng dalawang lider ang defense and security, economic cooperation, infrastructure development, pagpasok ng Filipino skilled workers sa Japan, at Japanese assistance para sa kaunlaran ng Bangsamoro region.
Maaaring magpapalitan din ng pananaw ang dalawang lider sa mga isyu sa rehiyon kabilang ang Korean Peninsula at South China Sea.
“Peace and stability in the region is a mutual concern to both the Philippines and Japan, and the South China Sea is central in this regard,” ani Montealegre.
Inaayos na rin ang schedule ng Pangulo para makadaupang-palad ang Filipino community sa Japan.