‘End Endo’ bill pinupuri, pinagdududahan
Pinuri ng labor group na Trade Union Congress of the Philippines (TUCP) ang pagpasa ng Security of Tenure bill dahil maghahatid umano ito ng pag-asa sa milyun-milyong manggagawang nasa ilalim ng contractual scheme.
Nitong Miyerkules, inaprubahan ng Senado sa ikatlo at pinal na pagbasa ang panukalang batas na naglalayong burahin ang practice ng “endo” o “end of contract” ng employers at igarantiya ang security of tenure ng mga manggagawa.
“The bill will incentivize workers to higher labor productivity by regularizing huge numbers of them. It will cut down production costs by doing away with ‘labor-only’ or ‘cabo’ contractors whose financial services charges add 15% to the labor costs of employers utilizing such agencies,” sinabi ni TUCP president Raymond Mendoza.
Sa isang pahayag, sinabi ng TUCP na sa pagpasa sa panukala ay magsisimula ang proseso ng tuluyang pagwawakas sa contractualization.
Ngunit para sa Bukluran ng Manggagawang Pilipino (BMP), adelantado kundi man tahasang pagkakamali ang magdiwang sa pagpasa ng “End Endo” bill sa Senado.
Ayon kay BMP leader Ka Leody de Guzman, ang panukala ay taliwas sa kahilingan ng mga manggagawa na ipagbawal ang mga trilateral work arrangement, na siyang batayan ng kontra-manggagawang plano ng kontraktuwalisasyon.
Sinabi pa ni De Guzman na totoong ang panukala ng Senado ay nagnanais ng istriktong regulasyon ng job contracting ngunit tadtad ito ng mga butas.
”Maaring naglagay nga ito ng mas mabigat na parusa sa mga lumalabag ng mga kapitalista. Ngunit dahil kung pinanatili nitong legal ang iskema para gawing mura at maamo ang mga manggagawa, tila na ring ginawa nitong inosente ang lahat ng prinsipal na employer at mga kontratista ng mga trilateral work arrangements,” giit ng BMP leader.