Harvey Weinstein, aareglo sa halagang $44M
N AGKASUNDO na si Harvey
Weinstein, ang mga babaeng nag-aakusa sa kanya ng sexual misconduct, ang mga dating board members ng kanyang dating film studio, at ang New York attorney general’s office sa isang $44 million deal upang resolbahin ang mga asunto at aregluhin ang mga umano’y nabiktima ng Hollywood producer.
Ito ang iniulat kahapon ng Wall Street
Journal, batay sa salaysay ng source na pamilyar sa isyu.
Sakaling maisapinal na, reresolbahin ng nasabing kasunduan ang civil rights lawsuit na inihain ng attorney general’s office ng New York noong nakaraang taon na nag-aakusa sa mga opisyal ng Weinstein Co. ng kabiguang protektahan ang mga empleyado nito mula sa pang-aabuso, at sa mismong sexual misconduct ni Harvey, iniulat ng Journal.
Ayon sa Journal, hindi makaaapekto ang proposed agreement sa kasong kriminal na kinahaharap ni Harvey sa Manhattan, kung saan kinasuhan siya ng rape at iba pang sex crimes. Itinakda sa Setyembre ang paglilitis para sa nasabing kaso.
Hindi naman kaagad na nagbigay ng komento ang kinatawan ni Harvey at ng Weinstein Co. nang hingan ng pahayag sa usapin. Dati nang itinanggi ni Harvey ang mga paratang sa kanya.
Umani ng mga papuri at parangal sa pamamagitan ng kanyang kumpanya at ng isa pang studio, ang Miramax, para sa mga pelikulang kinabibilangan ng Shakespeare
in Love, Pulp Fiction, at The King’s Speech, sumadsad sa kahihiyan at kontrobersiya si Harvey matapos na mahigit 70 babae, karamihan ay kabataang aktres at iba pa sa movie business, ang nag-akusa sa kanya ng sexual misconduct sa nakalipas na mga dekada.
Habang dumadami ang lumalantad para maglatag ng demanda laban kay Harvey, sinibak siya ng kanyang kumpanyang Weinstein Co. saka naghain ng bankruptcy, at pinatalsik naman siya sa Academy of Motion Picture Arts and Sciences.
Dahil sa kanyang mga kinakaharap na kaso, inilunsad ang #MeToo movement, at maraming makakapangyarihang lalaki sa larangan ng entertainment, pulitika, at iba ang inakusahan ng sexual misconduct.