BAWAL MUNA SA CANADA
Malacañang sa gov’t officials:
Seryoso ang Malacañang sa paglilimita sa diplomatic relations sa Canada matapos maglabas si Executive Secretary Salvador Medialdea ng memorandum na pumipigil sa official trips ng mga opisyal ng pamahalaan sa Canada, at pakikipagtransaksiyon sa bansang North American.
Sa isang pahayag nitong Linggo, kinumpirma ni Presidential Spokesman Salvador Panelo na naglabas si Medialdea ng memorandum, ilang araw bago ipinag-utos ni Pangulong Rodrigo Duterte ang pagbibiyahe ng basura ng Canada pabalik sa nasabing bansa.
Sa memorandum, inilabas noong Mayo 20, inaatasan ang lahat ng department secretaries at mga pinuno ng mga ahensiya, governmentowned and controlled corporations, at government financial institutions na umiwas sa pagbibigay ng travel authorities para sa mga opisyal na biyahe sa Canada.
Inaatasan din nito ang mga pinuno ng government agencies na bawasan ang official interaction sa mga kinatawan ng Canadian government.
“We maintain that these directives are consistent with our stance on the diminished diplomatic relations with Canada starting with the recall of our Ambassador and Consul-General in that country in light of Canada’s failure to retrieve its containers of garbage unlawfully shipped to the Philippines,” aniya.
Sa memorandum, sinabi ni Medialdea na ang hakbang ay pagdidiin sa mga demand ng gobyerno matapos mabigo ang Canada na hakutin ang basurang ipinadala sa Pilipinas ng isang pribadong kumpanya noong 2013.
BASURA NG AUSTRALIA,
HONG KONG Samantala, hinimok ni Quirino Rep. Dakila Carlo “Dax” Cua si Pangulong Duterte na silipin ang iniulat na shipments ng basura mula Australia at Hong Kong, at ipag-utos ang agarang pagpapabalik sa mga ito.
Sinabi niya na dapat nang makialam ang Malacañang sa sinasabing garbage shipments, kasabay ng panawagan ng pagpapatupad sa mas istriktong pagbabantay sa ilegal na pagpasok ng mga basura sa bansa.
“I hope the President can also look into reports of garbage coming in from Australia and Hong Kong, and issue directives for their immediate return. For its part, the Bureau of Customs should also demonstrate its tough stance against illegal shipments of garbage,” ani Cua, chairperson ng House Committee on Ecology, sa isang pahayag.