Organikong pataba mula sa nabubulok na basura

PLANO ng lokal na pamahalaan ng Koronadal City sa South Cotabato na simulan ang produksiyon ng sariling organikong pataba sa susunod na buwan, gamit ang mga biodegradable o mga nabubulok na basura mula sa kabahayan at mga establisyamento.

Ito ay matapos na ihayag ng pamahalaang lungsod na bubuksan na nito ngayong linggo ang large-scale composting facility sa anim na ektaryang sanitary landfill ng lungsod sa Purok Pagunsan, Barangay Paraiso.

Sa pagbabahagi ni City Mayor Peter Miguel kamakailan, sinabi niyang kasalukuyan nang inaayos ng lungsod ang mga kailangan para sa full operation ng P20-milyon pasilidad.

Aniya, pangangasiwaan ng City Environment and Natural Resources Office (CENRO) ang operasyon ng pasilidad.

Ayon na lokal na pamahalaan, Pebrero ngayong taon nang nakipag-ugnayan ang lungsod sa machinery distributor na Trans Orient Group para sa mga kailangang kagamitan at teknolohiya para sa proyekto.

Personal din na binisita ng mga tauhan ng city hall ang isang composting facility sa Bayawan City, Negros Oriental para sa proyekto.

Ayon sa alkalde, kumpleto na ang mga kagamitan at makina sa pasilidad na kinakailangan sa pagpoproseso ng biodegradable waste upang maging fertilizer.

“This (fertilizer) will be given out for free to our farmers and other interested residents,” aniya.

Sa pagsisimula ng operasyon sa pasilidad, sinabi ni Miguel na kokolektahin ng pamahalaang lungsod ang residual at biodegradable waste mula sa mga bahay at establisyamento.

Sa ilalim ng Republic Act 9003, o ang Solid Waste Management Act, sinabi ni Mayor Miguel na obligasyon ng lokal na pamahalaan na kolektahin ang mga basura, habang ang mga barangay ang kinakailangang mangasiwa sa mga nare-recycle at mga nabubulok na basura.

Pinaalalahanan din niya ang mga residente na matutong mag-segregate ng mga basura sa biodegradable and nonbiodegradable waste para sa tamang pangongolekta at at pagtatapon sa mga ito.