Tapos na ang problema sa plaka, kasabay ng pangako ng LTO para sa mas mabilis na serbisyo
IPINAGDIRIWANG ngayong linggo ng Land Transportation Office (LTO) ang ika-107 anibersaryo nito, tampok ang magandang balita na ang matagal nang problema sa plaka ng mga sasakyan, na nagsimula noong 2013 sa panahon ng dating administrasyon, ay nasolusyunan na sa wakas.
Sa maraming taon na lumipas, maraming nagmamay-ari ng mga sasakyan ang hindi pa nakakakuha ng kanilang plaka dahil sa problemang lumutang, matapos ilunsad noon ng bagong administrasyong Aquino ang programa para sa modernisasyon ng mga plaka ng mga rehistradong sasakyan sa bansa, at naibigay ang kontrata para sa produksiyon ng plaka sa isang joint venture. Gayunman, pinawalang bisa ng Commission on Audit (CoA) ang kontrata noong 2015, matapos na apat na milyon lang sa 15 milyong plaka ang nailabas.
Umabot ang kasong ito sa Korte Suprema. Noong Enero 2018, tinanggal ng korte ang Notice of Disallowance at noong Hulyo 2018, inaprubahan ng Department of Transportation ang amyenda para sa kontrata, at sa wakas, nakausad na ang LTO at naayos na ang problema sa mga naantalang plaka ng sasakyan.
Lahat ng ito ay inihayag nitong Mayo 21 ni Assistant Secretary Edgar C. Galvante, hepe ng LTO, sa pagdiriwang ng ika-107 anibersaryo ng ahensiya. Bukod sa resolusyon sa matagal nang usaping legal, inihayag din ng LTO na nakapagtayo nang muli ang ahensiya ng sariling pagawaan ng plaka, at lubusan nang gumagana ang awtomatikong produksyon.
“We at the LTO are targeting to completely resolve the backlog on motor plates by mid2020,” aniya. Ito ang tugon ng LTO, aniya, sa naging hamon ni Pangulong Duterte sa State of the Nation Address nito noong Hulyo 2010, na “Paglabas sa casa, may plaka na.”
Ayon kay Galvez, naglatag na rin ang LTO ng modern technology-based innovation para sa pagbabayad ng taunang pagpaparehistro sa mga motor na sasakyan, para sa pagsasaayos ng motor vehicle inspection system, sa pagbibigay ng five-year driver’s license, at paghahanda para sa hanggang sampung taon na lisensiya, sa online na pagsusumite ng medical certificate, sa road safety operation, para sa anti-colorum na Oplan Barracuda, at sa iba pang reporma para sa mas mabilis at mas maayos na serbisyo sa Information and Communications Technology Center, isang mahalagang hakbangin para sa kasaysayan ng LTO.
Sa pamamagitan ng lahat ng pagbabagong nabanggit, at sa pagtatapos ng matagal nang problema sa plaka, umaasa tayo sa mas maganda at mas maayos na serbisyo mula sa ahensiyang ito, ang Land Transportation Office, ng Department of Transportation.