‘Back to Bakuna’ inilunsad sa Calabarzon
Inilunsad ng Department of Health (DoH) sa Calabarzon (Cavite, Laguna, Batangas, Rizal, Quezon) ang kanilang “Back to Bakuna” schoolbased immunization program upang mapagkalooban ng libreng bakuna ang mga mag-aaral sa rehiyon.
Ang programa ay isinagawa sa Santa Rosa Elementary School Central III sa Sta. Rosa, Laguna, katuwang ang Department of Education- Calabarzon at Sta. Rosa local government, kung saan 3,047 mag-aaral ang target nilang mabakunahan.
“We are certain that we can immunize all our target children in the region now that the trust and confidence of parents in the immunization program of the DOH are slowly returning,” ayon naman kay Regional Director Eduardo Janairo, na nanguna sa aktibidad.
“Nakikita natin ito sa dagsa-dagsang magulang na dinadala ang kanilang anak sa mga health center at ang pagbibigay nila ng kanilang parental consent upang mabigyan ng bakuna ang kanilang anak laban sa tigdas at iba pang sakit na preventable lamang sa pamamagitan ng tamang bakuna,” aniya pa.
“Measles is preventable and vaccination is the only way to prevent it. Napakaimportante na lahat ng bata ay mabakunahan upang maiwasan natin ang pagkakaroon ng epidemya. Mahalaga rin na palakasin natin ang pangangatawan ng mga bata sa pamamagitan ng pagbibigay ng tamang nutrisyon, tamang pahinga at wastong pagkain,” ayon pa sa opisyal.
Layunin din ng nasabing programa na magkaloob ng libreng measles at rubella vaccines, kabilang na ang mga booster doses ng tetanus-diphtheria vaccines sa public school children mula kindergarten hanggang Grade 7, o mula lima hanggang 13-taong gulang.
Tatagal ang kampanya hanggang sa Setyembre ng taong ito.
Sa rekord ng Regional Epidemiology and Surveillance Unit (RESU), aabot na sa 8,674 measles cases ang naitala nila sa rehiyon mula Enero 1, 2019 hanggang Hulyo 25, 2019, na 931% na mas mataas sa 841 kaso na naitala noong 2018. Sa naturang bilang, 167 pasyente ang kumpirmadong nasawi.