‘Oplan sa Kalusugan’ para sa BARMM

PINANGUNAHAN kamakailan ng Ministry of Basic, Higher, and Technical Education of the Bangsamoro Autonomous Region in Muslim Mindanao (MBHTE-BARMM) ang paglulunsad ng programang Oplan sa Kalusugan (OK sa DepEd) ng Department of Education sa Upi, Maguindanao.

Layunin ng “OK sa DepEd”, na masigurong maayos ang kalusugan at ang nutrisyon ng mga mag-aaral, na bahagi ng programa, plano, at aktibidad ng DepEd tungo sa epektibo at maayos na implementasyon sa mga paaralan.

Sa pagpapatupad ng programa, sinabi ni Minister Mohagher Iqbal ng MBHTE-BARMM na tuon ngayon ng rehiyon ang anim na programa tulad ng School-Based Feeding Program; National Drug Education Program; Adolescent Reproductive Health; Water Sanitation and Hygiene in Schools; Mental Health; and Medical, Nursing, at Dental Services.

“It is the goal of the Bangsamoro government to improve the Bangsamoro education system by providing quality, holistic, and relevant instruction to every learner,” pahayag ni Iqbal sa paglulunsad ng programa sa paaralan ng Pedro Dolores Elementary School (PDES) sa lugar.

“It would be unacceptable if our students would miss school days, get behind in their lessons or drop-out due to health-related issues such as malnourishment, unintended pregnancies, and drug addiction,” dagdag pa niya.

Ayon kay Iqbal, inaasahan na ang programang pangkalusugan ay makatutulong upang maiwasan ang kalimitang sanhi ng pagkamatay dulot ng mga sakit sa mga magaaral sa rehiyon.

Dagdag pa ng opisyal, bubuo ang ahensiya ng grupo na tututok sa programa upang masiguro ang tamang implementasyon nito sa mga paaralan ng BARMM.

“The ministry is committed not only in improving the teaching standards and facilities but also the school performance and learning capacity of every student in the Bangsamoro,” aniya.

Kabilang naman sa bahagi ng pangkalusugan at nutrisyon na programa sa PDES ang tamang paghuhugas ng kamay, feeding program, deworming, at basikong medikal at dental na serbisyo.