Lotto, STL, tigil na: Betting stations, isinara
Dismayado si Pangulong Rodrigo Duterte sa sabwatan ng lahat ng government-sanctioned gaming schemes dahil dinadaya ng mga ito ang pamahalaan sa bahaging kikitain sana nitong laan sa pangunahing serbisyo nito sa publiko.
Ito ang inihayag ni Presidential Spokesman Salvador Panelo kasunod na rin ng kautusan ni Pangulong Rodrigo Duterte na ipasara ang lahat ng outlet ng Lotto, Peryahan ng Bayan, Keno, at iba pang gaming schemes na binibigyang-permiso ng Philippine Charity Sweepstakes Office (PCSO) dahil sa umano’y malawakang kurapsiyon.
Aniya, nagalit ang Pangulo nang matuklasang nagkakaroon ng “grand conspiracy” sa nasabing gaming enterprises na ang kawawa ay ang pamahalaan at publiko.
“It appears that there is a grand conspiracy among the major players and enforcers of these governmentsanctioned gaming activities and enterprises to cheat the government of its rightful shares, depriving therefore the masses of our people of receiving basic services needed by them. The President is outraged by the discovery of the plunderous machinations of these scoundrels whose insatiable greed is infinite and beyond redemption,” sabi ni Panelo.
Sa isang special message na na-upload sa Presidential Communications Facebook nitong Biyernes, iniutos ni Duterte na kanselahin ang lahat ng lisensiya, concessionaires, at prangkisang ipinalabas ng PCSO.
Sa kautusan, ipatutupad ito ng lahat ng law enforcement agencies at aarestuhin ang sinumang sumuway nito.
Hindi rin aniya nito pahahalagahan ang mga court order na pipigil sa pamahalaan na ipasara ang lahat ng gaming schemes outlet na binigyang permiso ng PCSO na makapag-operate.
Ipinaliwanag ni Panelo, tutukuyin ng Pangulo ang nasa likod ng malawakang kurapsiyon upang masigurong mananagot ang mga ito sa batas.
“The Chief Executive will identify the culprits in due time and the full force of the law will come crushing down on them. This hydra-headed corruption will be cut off until it reproduces no more,” sabi nito.
Babala ni Panelo, hindi aniya nagbibiro ang pangulo sa pangako nito na tatapusin niya ang kurapsiyon sa pamahalaan.
“0Let this be a stern warning to all malefactors in the government, as well as all the enemies of the state, the Duterte presidency will be unrelenting in its war against corruption and unforgiving to the transgressors of the law. The President shall continue to brandish the flaming sword of his office and strike it at the heart of this social and political monstrous dragon,” ayon pa sa kanya.