KURAPSIYON SA PCSO, SINISILIP NA
Iniimbestigahan na ni Pangulong Rodrigo Duterte ang sinasabing malawakang kurapsiyon sa Philippine Charity Sweepstakes Office (PCSO).
Ito ang kinumpirma ni Presidential Spokesman Salvador Panelo na nagsabing mabilisan lamang ang nasabing pagsisiyasat.
Inilabas ni Panelo ang pahayag kasunod na rin ng pagpapasara ng Philippine National Police (PNP) sa tinatayang aabot sa 21,000 lotto at Small-Town Lottery (STL) sa buong bansa, alinsunod na rin sa utos ng Pangulo.
Masinsinan aniya ang pagiimbestiga ng Pangulo sa usapin upang matukoy nito ang nasa likod ng sinasabing “grand conspiracy”.
“Sa ngayon kasi sabi nga ni Presidente, iniimbestigahan niyang maigi para malaman niya at matukoy niya kung sino ‘yung mga involved at i-identify niya lahat sa lalong madaling panahon. Until such time na hindi pa natatapos ang imbestigasyon, sarado muna lahat. Si Presidente naman mabilis, eh. Kita mo mabilis agad yung order niyang ipasarado,” paglalahad ni Panelo.
Nilinaw ni Panelo, hindi madalian ang naging desisyon ni Duterte dahil nakipagpulong muna ito sa mga opisyal ng ahensya bago niya iutos ang pagpapasara sa lahat ng gaming schemes sa ilalim ng PCSO.
“Nag-meeting si Presidente tsaka yung bagong head ng PCSO bago niya in-announce ‘yun, a few hours before. In fact, magkakasama sila at the time,” sabi nito.
Tiniyak ni Panelo na tutulungan pa rin ng pamahalaan ang mga nangangailangan ng financial o medical assistance.
Aniya, maaari lamang magtungo ang mga ito sa Office of the President o lumiham sa kanila upang mairefer sa kinauukulang ahensiya ng pamahalaan.
“Yung mga request nila will be redirected sa (Their request will be redirected to) PAGCOR tsaka sa Office of the President, and other agencies at magre-respond tayo sa kanilang mga hininging tulong,” paliwanag pa ng tagapagsalita ni Duterte.
Posible namang bumalik ang operasyon ng jueteng sa bansa at samantalahin ang suspensiyon ng operasyon ng lotto at STL.
Ito ang reaksyon ni Philippine National Police (PNP) chief Gen. Oscar Albayalde.
Nakatanggap aniya sila ng intelligence reports na magkakaroon ng pagpapatuloy ng jueteng operations sa dalawang lalawigan sa Gitnang Luzon.
Inihayag naman ni Department of Justice (DoJ) Secretary Menardo Guevara na hindi kaagad na mabubuksan ang operasyon ng mga sugal na pinangangasiwaan ng PCSO.