57 patay sa riot sa kulungan

SAO PAULO/RIO DE JANEIRO – Limampu’t pitong bilanggo ang patay sa naganap na riot sa loob ng kulungan sa pagitan ng dalawang gang, sa Para, nitong Lunes.

Labing-anim sa bilang ang pinugutan. Ayon sa mga awtoridad, ito na ang pinakamadugong gulong naganap sa kulungan, habang sinusubukang aksyunan ng pamahalaan ng Brazil ang pagsasaayos ng punumpuno nang selda sa mga kulungan sa bansa.

Ayon sa report, nagsimula ang gulo ng bandang 7:00 ng umaga (1000 GMT) sa kulungan sa siyudad ng Altamira, na kinasangkutan ng dalawang magkaribal na grupo sa loob.

Sinunog ng mga bilanggo na kasapi ng Comando Classe A gang ang seldang tinitigilan ng karibal na Comando Vermelho o Red Command gang.

Dagdag pa, karamihan sa mga biktima ay nasawi dahil sa sunog. Nagawa ring ma-hostage ng dalawang warden ngunit pinakawalan din kalaunan.

Aabot sa 750,000 ang populasyon sa mga kulungan sa Brazil, na lumobo ng walong beses sa loob ng nakalipas na tatlong dekada, at pangatlong pinakamalaki sa buong mundo.

Ang mga miyembro ng nabanggit na gang ay dawit sa mga pagnanakaw sa mga bangko, drug trafficking, at gun-running. Ang mga nakakulong na umano’y Kingpin ang pinaghihinalaang kumokontrol sa kanyang mga kasabuwat sa labas ng kulungan gamit ang mga ipinuslit na cell phone.

Ang mga gang sa kulungan ay nabuo upang protektahan ang mga bilanggo at magkaroon ng adbokasiya sa pagkakaroon ng mas mabuting kondisyon sa mga kulungan, ngunit lumalabas na nagkaroon ng mas malawak na kapangyarihan ang mga miyembro dahil sa gang.