A$AP Rocky, lilitisin sa Stockholm
DUDULOG sa Swedish court ang U.S. rapper na si A$AP Rocky ngayong Martes para sa unang araw ng paglilitis sa kasong assault na isinampa laban sa kanya. Matatandaang ikinagalit ni U.S. President Donald Trump ang naturang kaso.
Nadetine ang 30-yearold performer, producer at model, tunay na pangalan ay Rakim Mayers, noong Hulyo 3 sa Sweden. Kaugnay ito ng pagkakasangkot ng rapper sa nangyaring street brawl sa Stockholm noong Hunyo 30. Kinasuhan siya ng assault dahil sa insidente.
Kung mahahatulan sa Stockholm district court, maaaring maharap ng hanggang sa dalawang taong pagkakakulong si A$AP Rocky.
“The rapper would plead not guilty at the trial,” ayon kay Slobodan Jovicic, abogado ni A$AP Rocky.
Ikinagalit ng maraming fans, artists at celebrities, gaya ni Kim Kardashian at rocker na si Rod Stewart, ang pagkakakulong ng rapper.
Nakaabot kay Trump ang kaso at hiniling nito kay Swedish Prime Minister Stefan Lofven na tulungan siyang palayain si A$AP Rocky. Kalaunan ay nag-tweet si Trump na siya ay “very disappointed” kay Lofven kasabay ng panawagan nitong, “Treat Americans fairly!”.
Personal na ring sinabi ng
US Presidente na siya mismo ang magbabayad ng piyansa ni A$AP Rocky, ngunit walang bail system ang Sweden.
Nauna nang ipinahayag ng Prime Minister na hindi niya iimpluwensiyahan ang kaso ng rapper. “Sweden’s judiciary is independent of the political system.”
Taong 2011 nang makilala si A$AP Rocky sa album na Live.Love.A$AP.
Ang kanyang pinakabagong album na Testing ay nakapasok sa No.4 spot sa Billboard 200 charts nang i-release noong nakaraang taon.