Solar eclipse ngayong araw

May pagkakataon ang mga Pilipino na matunghayan ang “ring of fire” eclipse ngayong araw, Disyembre 26 sa ilang bahagi ng Pilipinas. Ang susunod na matutunghayan ito ay sa Pebrero 28, 2063.

Posibleng matunghayan ang annular eclipse sa katimugang bahagi ng Pilipinas, partikular sa Glan (Batulak), Balut at Sarangani Island, sa ilang bahagi ng Saudi Arabia, Qatar, United Arab Emirates, Oman, India, Sri Lanka, Malaysia, Indonesia, Singapore, Northern Mariana Islands, at Guam, ayon sa Philippine Atmospheric, Geophysical and Astronomical Services Administration (PAGASA).

“The moon will cross the sun completely. However, the moon’s orbit is in a position farthest away from earth. This means that the moon’s apparent size in the sky is not large enough to completely cover the sun, as witnessed during total solar eclipses. This, instead, creates a ‘ring of fire’ effect,” pagbabahagi ni PAGASA weather specialist Mario Raymundo.

Kung pahihintulutan ng panahon, maaaring matunghayan ang partial solar eclipse na magsisimula ng 12:32 ng hapon at tinatayang matatapos ng 3:47 ng hapon sa Balut Island, Saranggani, Davao Occidental.

Inaasahang tatagal ito ng tatlong oras, habang ang dalawang minutong tatagal ang annularity.

Bukod sa mga nabanggit na lugar, maaari ring masilatan ang partial solar eclipse sa Manila, Quezon City, Aparri, Laoag, Legazpi, Puerto Princesa, at Mactan.

Noong Hulyo 20, 1944 pa huling natunghayan ng Pilipinas ang isang annular eclipse na nasilayan sa Puerto Princesa City, Palawan hanggang Southern Mindanao.