Senior citizen, 3 pa huli sa pagsusugal
Sa kulungan nagdiwang ng Pasko ang apat na lalaki matapos mahuli umano sa aktong nagsusugal sa magkakahiwalay na insidente sa Pasay City, kamakailan.
Kinilala ang mga suspek na sina Alberto Soriano, 48, may asawa, at taga-1918 Tramo Street, Bgy. 57, Pasay City; Edmond Ebon, 23, taga-701 Zone 77, Leveriza, Maynila; Erwin Acosta, 60, may asawa, aircon technician, taga14th-15th St., Bgy. 183 Villamor, Pasay City at Jes Ran, 31, binata, vendor, at taga-15th-16th St., Bgy. 183 Villamor sa nasabing lungsod.
Sa ulat ni Pasay City Police chief, Colonel Bernard Yang, nagkasa ng anti-criminality operation ang kanyang mga tauhan sa pangunguna nina S/ Sg Jose Baldoza Jr at Cpl Ryan Zafra, sa Jockian St., Bgy. 57, dakong 1:30 ng umaga nitong bisperas ng Pasko.
Namataan ng awtoridad ang umpukan ng isang grupo ng lalaki na nagsusugal ng cara y cruz sa kalye hanggang sa nagtakbuhan ang mga ito sa magkakahiwalay na direksiyon subalit minalas na masakote sina Soriano at Ebon.
Narekober sa mga suspek ang P240 na umano’y bet money/pusta at tatlong pirasong 25 coins na pangkara.
Kalaboso din ang inabot nina Acosta at Ran nang maaresto sa 15th-16th St., Bgy. 183 sa ikinasang Oplan Galugad ng mga tauhan ng Police Community Precinct (PCP) Villamor,bandnag 1:40 ng hapon.
Narekober sa mga suspek ang P490 pusta at tatlong pirasong P1.00 coin na ‘pangara’ sa naturang sugal.
Agad itinurn-over ang apat na suspek sa tanggapan ng Station Investigation and Detective Management Branch (SIDMB) para sa kaukulang imbestigasyon at pagsasampa ng kasong paglabag sa Presidential Decree 1602 (Illegal Gambling Act) laban sa mga ito.