R100M para sa atleta sa Tokyo Games, suporta ng Malacañang GRABE!
MAS maraming atletang Pinoy ang inaasahang mapapabilang sa Team Philippines na sasabak sa 2020 Tokyo Olympics.
Tumataginting na P100 milyon na dagdag na pondo ang iniutos ng Pangulong Duterte na gamitin para ponduhan ang pagsasanay at pagsabak sa Olympic qualifying meet ng mga atleta may malaking tsansa na makahirit nang inaasam na slots sa quadrennial Games.
Mistulang ‘Santa Clause’ sa mata ng mga atletang Pinoy ang Pangulong Duterte matapos ipamigay ang karagdagang ‘cash incentives’ sa mga atletang Pinoy na nagwagi ng medalya sa katatapos na 30th Southeast Asian Games kungg muling itinanghal na overall champion ang Team Philippines sa nakamit na 149 gold medal.
Bukod sa cash gift, pinarangalan ang mga atleta sa Malacanang sa ipinagkaloob na ‘Order of Lapu-Lapu’.
“Nakakataba ng puso. Todo ang suporta ng Pangulong Duterte sa amin. Kaya kami po ay hindi titigil sa pagsasanay para mabigyan ng karangalan ang bansa at naway palarin na makalaro sa Olympics,” pahayag ni mountain bike SEAG silver medalist Nino Surban.
Ikinalugod din ni Agatha Wong, double gold medalist sa wushu, ang pagkalinga ng Pangulo sa kanilang hanay.
“We received the best and honestly kung ganito ang laging makukuhang suporta ng atleta, talagang pursigido ang lahat,” aniya.
Mismong ang Pangulong Duterte ang nag-utos kay Philippine Amusement and
Gaming Corp. (Pagcor) chairman Andrea Domingo na maglaan ng P100 million para tustusan ang paghahanda ng atletang Pinoy sa Tokyo Olympics na nakatakda sa Hulyo 24 hanggang Agosto 9.
Sa kasalukuyan, tanging sina pole vaulter EJ Obiena at gymnast Carlos Yulo ang sigurado na sa Olympics, habang nangangailangan pa ng sapat na qualifying points sina weightlifter at Rio Olympics silver medalist Hidilyn Diaz, boxers Nesty Petecio at Eumar Marcial, gayundin si skateboarder Margilyn Didal at ilang atleta sa swimming, taekwondo, cycling, judo at athletics.
“We expect the funds to come in after the holidays and that’s where the ball really gets rolling,” pahayag ni Philippine Sports Commission (PSC) Chairman William ‘Butch’ Ramirez.
Ayon kay Ramirez, labis ang pangangalaga ng Pangulong Duterte sa mga atleta at patunay dito ang pagpayag nito na maglaan ng P6.5 bilyon pondo para sa Sports mula sa General Appropriations.
“Basta naman nakikita ni Presidente na produktibo at walang corruption, talagang all-out ang support,” sambit ni Ramirez
Nakamit ni Obiena ang Olympic slots nang makamit ang qualifying mark na 5.81meters sa isang torneo sa Italy. Sa kasalukuyan, siya ang No.10 sa world ranking.
Sumunod ang 19-anyos na si Yulo nang makamit ang gold medal sa floor exercise sa ginanap na World Championship sa Stuttgart, Germany. Sa katatapos na SEA
Games, napagwagihan niya ang dalawang ginto at limang silver medal.
Nakatakdang maging multimillionaire ang atletang magwawagi ng gintong medalya sa Tokyo Games sa naghihintay na ‘cash incentives’ na P10 million batay sa batas at inaasahang ayuda mula sa Office of the President, Philippine Olympic Committee, Senate at House of Representatives, gayundin sa pribadong sektor.