Kickboxing, isusulong ni ‘Tol’ sa Palaro, Batang Pinoy
KICKBOXING sa Palarong Pambansa?
Para kay Samahang Kickboxing ng Pilipinas (SKP) president Sen. Francis ‘Tol’ Tolentino, napapanahon na mapabilang ang sports sa sa Palarong Pambansa, gayundin sa collegiate league tulad ng UAAP at NCAA.
Ayon kay Tolentino, mahabang taon nang ginagamit ang kickboxing bilang isang martial arts discipline at kung pagbabatayan ang naging tagumpay ng sports sa katatapos na 30th Southeast Asian Games, isang indikasyon na may malaking potensyal ang Pinoy na magtagumpay sa kickboxing at maging world champion.
“Nakita natin bilang isa sa sports na isinagawa sa SEA Games sa unang pagkakataon, naging matagumpay an gating mga atleta. Kung mapapalakas natin ang grassroots program sa Palaro, Batang Pinoy at sa schoolbased league, mas marami tayong mapagkukunan ng atleta na future world champion,” pahayag ni Tolentino.
Nakamit nina Gina Iniong, Jean Claude Saclag, at Jerry Olsim ang gintong medalya sa SEA Games.
Ginapi ni Iniong, atomweight mixed martial artist sa pro ONE Championship, si Apichaya
Mingkhwan ng Thailand, 3-0, sa women’s 55-kilogram kick light category, habang nagwagi si Saclag sa men’s 63.5kg low kick kontra “Jordan Boy” Mohammed Bin Mahmoud ng Malaysia, 3-0 decision, at tagumpay si Olsim sa men’s 69kg kick light competition.
Nakamit din ng Team Philippines ang silver medal mula kina Renalyn Daquel sa women’s 48kg full contact bracket at Jomar Balangui sa men’s 54kg lock kick competition.
“Napadaming kickboxing practitioner sa ating bansa. Halos lahat ng gym ay nag-ooffer nito. Paok ang Pinoy sa sports na ito at kung mapagtutulungan natin ang development, mas marami tayong mapo-produce na kampeon dito,” sambit ni Tolentino.
Sa kasalukuyan, iginiit ni Tolentino na makikipagpulong siya sa mga opisyal ng ng SEAG Federation upang masiguro na makakasama ang kickboxing sa sports calendar ng 2021 SEA Games sa Vietnam.
“After consecutives SEA Games, puwede na tayong makipag-usap sa Asian Federation para naman makasama na rin sa Asian Games,” ayon kay Tolentino.