NPA recruitment, pinalagan
Nasa higit 300 katao, karamihan mga kabataan ang nagtipun-tipon para sa isang pro-government rally sa Parañaque City,kahapon ng umaga.
Ayon sa ulat ng Southern Police District (SPD), sinimulan ang rally sa Service Road, Baclaran, dakong 7:00 ng umaga.
Layunin ng aktibidad na suportahan ang kapayaan at development building initiative ng kasalukuyang administrasyong Duterte sa pamamagitan ng pagkondena sa lahat ng uri ng karahasan, terorismo at paninikil na sagabal sa katahimikan at kaunlaran ng mga komunidad.
Ipinanawagan ng mga ito sa gobyerno ang pag-aresto kay Communist Party of the PhilippinesNew People’s Army-National Democratic Front (CPP-NPA-NDF) founder Jose Maria Sison.
Panawagan din ng grupo sa kabataan, huwag magpalinlang sa grupong komunista at iwasan ang mga humihikayat para sumama sa kanilang kilusan.
Iginiit ng grupo, na isa ang NPA sa pangunahing human rights violator kung saan sinisira ang kaisipan ng mga kabataan upang mag-aklas laban sa gobyerno o pamahalaan.
Anila, sa halip na tumulong sa kanilang pamilya ay tuluyan na umanong nasira ang kinabukasan ng mga kabataan na sumama sa NPA.
Kabilang ang mga lugar na nakilahok sa rally ang buong katimugang bahagi ng Metro Manila kabilang ang mga residente ng barangay buhat sa Parañaque City, Makati City, Taguig City,Muntinlupa City, Pasay City, Las Piñas City at Pateros.
Target ng grupo na maipaabot sa pamahalaan ang kanilang panawagan upang tulungan silang maiwasan ang patuloy na recruitment ng mga rebelde sa kabataang estudyante.