PNP, inalisan ng procurement power
Ang pagkakamali sa presentasyon ng data para sa pagbili ng equipment upang maiwasan ang mga aksidente sa kalye ang naging dahilan para tanggalan ang Philippine National Police (PNP) ng kanyang procurement power.
Sinabi ng sources na nagsimula ang lahat nang magpresinta ang isang ranking police official ng data sa items na bibilhin ng PNP bilang pagtalima sa kautusan ni Pangulong Rodrigo Duterte na magsagawa ang pulisya ng mga hakbang para maiwasan ang fatal road accidents.
Sa presentasyon, binanggit na bibili ang PNP ng alcohol breath analyzers na nagkakahalaga ng P1 milyon bawat isa. Ito diumano ang nagtulak kay Pangulong Duterte na tanungin si PNP Officer-InCharge Lt. Gen. Archie Gamboa.
Ang nagpapalala sa sitwasyon ay nang inimpormahan diumano ang Pangulo ng isang opisyal sa Davao City na ang alcohol breath analyzers ay mabibili lamang sa halagang P6,000 bawat isa.
Resulta, inalis ni Pangulong Duterte ang kapangyarihan ng PNP na bumili ng kagamitan at inilipat ito kay Department of the Interior and Local Government (DILG) Secretary Eduardo Ano.
Lumalabas na nawalan ng tiwala at kumpiyasan si Duterte sa PNP nang madawit si noo’y PNP chief Gen. Oscar Albayalde sa multi-million shabu recycling at extortion.
Kinumpiurma ni Ano na ang pagkakamali sa presentasyon ay nangyari sa Joint Armed Forces of the PhilippinesAFP Command Conference.
“The PNP made a very glaring mistake in its presentation by mixing up terms and figures,” aniya, idiniin na ito ay isang honest mistake.
Ang hindi diumano naipaliwanag ni Gamboa at ng iba pang police official, ayon sa sources, ay kasama sa bibilhin ng PNP ang computer system na pagiimbakan ng data.
Idiniin ni PNP spokesman Brig. Gen. Bernard Banac na walang overpricing dahil ito ay estimated price lamang na isasalang pa sa bidding process.
Ngunit sinabi niya na inaprubahan ng Panguko ang P330 milyon para sa equipment para maiwasan ang mga aksidente sa daan.
APOLOGY
Sinabi ni Banac na humingi na sila ng paumanhin sa kalituhan sa isinagawang presentasyon, idinagdag na iginagalang at susundin nila ang desisyon ng Pangulo.
“The Philippine National Police under Officer-in-Charge, PLtGen Archie Francisco Gamboa respects and abides by the decision of the President to remove procurement of equipment as one of our administrative functions. We will endeavor to work this out in accord with our own procurement rules and systems specified by law,” saad sa pahayag ni Banac.
Sinabi niya na tumalima na ang PNP sa instruction ni Ano na magsumite ng ulat sa ipinalagay na overpricing. Idinagdag na “they leave it now to the President to consider our explanation”.
“We assure the public that we will never allow corruption in the PNP. The PNP has a very good record of procurement for the last 3 years with absorptive capacity of 98 percent with no protests from proponents,” ani Banac.