PCG: Port call ng China, makabubuti sa iringan
Hindi man nakasentro ang limang araw na pagbisita ng China Coast Guard sa Pilipinas sa mga pag-uusap kaugnay sa iringan sa West Philippine Sea, naniniwala ang Philippine Coast Guard (PCG) na ang port call ng kanilang katapat ay isang “right vehicle” para sa wakas ay matamo ang “safe sea” para sa mga mangingisdang Pinoy.
Ito rin ang layunin ng Chinese Coast Guard (CCG) sa pamumuno ni Major General Wang Zhongcai, CCG director general, sa pagdating ng kanilang barko sa PCG headquarters sa Manila na may bandilang nakasulat na ang pagbisita ay tungkol sa “strengthening dialogue and cooperation on maritime issues, making the South China Sea a sea of peace, friendship, and cooperation for the benefit of two peoples.”
“Ito na po ang tamang behikulo upang mabigyan ng lunas at mabigyan ng karampatang pang-unawa at procedure kung paano maproteksyunan yung ating mga mangingisda sa South China Sea,” sinabi ni Admiral Joel Garcia, PCG commandant, nang pangunahan niya ang pagsalubong sa Chinese Coast Guard kahapon.
“Bukal din naman sa kanilang isip na yung ating panukala na dapat pagusapan once and for all yung kaligtasan at seguridad ng mangingisda dito po sa South China Sea at West Philippine Sea,” ani Garcia.
‘MOVE FORWARD’ Binigyang-diin na ang Philippine Coast Guard ay hindi ang tamang ahensiya para maghawak sa sea dispute laban sa China, iginiit ni Garcia na para makabuo ng mechanism na pakikinabangan ng lahat ng mangingisda sa pinagtatalunang karagatan, kailangan ng bansa na mag“move forward.”
“Alam niyo po kung uunahin natin at alalahanin natin parati yung ginawang masama sa ating mangingisda, hindi na po uusad at hindi na natin kakusapin ang mga Chinese,” ani Garcia.
Sinabi rin ni Garcia na mainam din itong pagkakataon para mailatag ng PCG ang concerns nito para sa kaligtasan ng mangingisdang Pinoy, at matiyak na hindi na maulit ang Gem-Ver incident, kung saan ang mga mangingisdanbg Pinoy ay inabandona ng isang barkong Chinese matapos banggain ang kanilang bangka sa Recto Bank noong nakaraang taon.
“Sa tingin po namin kung mailatag at matanggap ng kabilang partido, sa tingin ko ay mababawasan o mawawala nang tuluyang yung sigalot or hindi pagkakaunawaan sa West Philippine Sea or South China Sea,” anang commandant.
Sinabi rin niya na walang komunikasypn ang dalawang nasyon sa nakalipas na nagresulta sa mga banggaan sa karagatan.
“Ito po yung nakikita naming kulang kaya for the past three years may ‘di pa rin pagkakaunawaan kasi ‘di pa rin nag-uusap yung tactical forces on the ground,” aniya.
WIN-WIN SITUATION Sinabi ng PCG commandant na kumpiyansa sila na ang pakikipag-usap sa kanilang Chinese counterparts ay magreresulta sa win-win situation.
“Dapat mag-result sa win-win situation, otherwise, bakit pa tayo haharap sa kanila? Alam niyo po, kami po 100 percent confident na magkakaroon tayo ng win-win situation sa pag-uusap natin sa CCG patungkol sa isusulong naming agenda,” ani Garcia.