Phivolcs, ipinatanggol ng Malacañang

Dinepensahan ng Malacañang ang Philippine Institute of Volcanology and Seismology (Phivolcs) matapos isulong ng isang mambabatas na imbestigahan ang ahensiya dahil sa diumano’y kabiguan nitong impormahan ang publiko tungkol sa napipintong pagputok ng Mt. Taal.

Ginawa ni Presidential Spokesman Salvador Panelo ang pahayag matapos manawagan si Cavite 4th District Representative Elpidio Barzaga Jr. sa House of Representatives na imbestigahan kung paano tumugon ang gobyerno sa pagsabog, binanggit ang diumano’y kawalan ng mga babala na inisyu sa publiko kaugnay sa pagsabog.

Sa kanyang press briefing nitong Huwebes, dinepensahan ni Panelo ang state seismology bureau, sinabi na walang makahuhula sa pagputok ng bulkan.

“As if malalaman mo kung kailan puputok ang bulkan,” aniya.

“But anyway that’s the prerogative and privilege of the legislature to call for hearing in aid of legislation. ‘Di hayaan mo sila,” dagdag niya.

Ayon kay Panelo, para sa Palasyo, walang pagkukulang ang Phivolcs sa pagibigay ng public information tungkol sa pagsabog ng Bulkang Taal.

“Magaling nga itong si Director [Renato] Solidum, eh. Mahusay magpaliwanag, eh,” aniya.

Idinagdag ni Panelo na hindi tulad ng mga bagyo na masusubaybayan ang kanilang mga galaw, hindi ito magagawa sa mga aktibidad ng bulkan.

“Nakikita natin brewing. On the basis of that, nakukha nila kung saan papunta, gaano kabilis, kalakas. Pero yung pagputok o earthquake, hindi mo mape-predict yun,” aniya.

Sinabi rin ng opisyal ng Palasyo na masaya si Pangulong

Duterte sa Phivolcs at magkakaloob ang gobyerno ng mga pondo para palitan ang kanilang mga gamit nasita sa pagsabog at bibilhan ng mga bago ang ahensiya.

“That goes without saying. Kung may nasira, kailangan palitan,” ani Panelo.

“Nasa Phivolcs ‘yan. ‘Pag nag-request sila na kailangan nila ang isang bagay to make them more effective, siyempre ibibigay natin,” dagdag niya.

Naghain si Barzaga ng House Resolution No. 643 nitong Lunes, sinabi na walang “news bulletins or SMS alerts” mula sa Phivolcs o alinmang ahensiya ng pamahalaan nang magsimulang magpakita ng mga senyales ng volcanic activity ang Taal.

Aniya, dapat imbestigahan ang state seismology bureau para matukoy kung mayroon itong technical expertise para magawa ng “timely forecast of the Taal Volcano eruption.”