Indonesian, nasagip sa ASG

Ligtas na nasagip ng Armed Forces of the Philippines (AFP) nitong Miyerkules ng gabi ang isang mangingisdang Indonesian na dinukot ng Abu Sayyaf Group (ASG) sa Sabah, Malaysia noong Setyembre 2019.

Matapos ang 115 araw ng pagkakabihag, nasagip rin sa wakas si Muhammad Farhan, 27 anyos, ng mga elemento ng Western Mindanao Command (WestMinCom) sa Barangay Bato-Bato, Indanan, Sulu dakong 6:45 p.m.

Ayon kay Lieutenant General Cirilito Sobejana, WestMinCom commander, naglunsad ang mga tropa ng serye ng “intensive combat and intelligence operations” na nagresulta sa pagkakasagip kay Farhan.

“Troops on the ground received information from the locals of Farhan’s whereabouts [which] led to the successful rescue,” aniya.

Iniulat na nakatakas si Farhan sa mga dumukot sa kanya hanggang isa isang sibilyan ang nag-ulat sa militar tungkol sa lokasyon ng mangingisda.

Kasunod nito ay tinungo ng mga sundalo ang lugar para iberipika ang tip na nagresulta sa pagkakasagip sa kanya.

Sinabi ni Sobejana na ang nasagip na kidnap victim ay dinala sa Kuta Heneral Teodulfo Bautista Station Hospital para sa inisyal na pagsusuri. Sunod siyang inilipat sa Camp Navarro General Hospital para sa medical tests at custodial debriefing.

“We are very pleased with this remarkable accomplishment of our Joint Task Force Sulu,” ani Sobejana.

Kabilang si Farhan sa tatlong mangingisdang Indonesian na dinukot ng mga militanteng ASG habang nangingisda sa Lahad Datu Island noong Setyembre 22, 2019.

Ang dalawa pang mga kasamahan ni Farhan, sina Maharudin Lunani, 48, at Samion Bin Maniue, 27, ay nailigtas ng militar noong Disyembre 22, 2019.