NBI Chinese desk, bubuksan sa Pebrero
Umaasa ang National Bureau of Investigation (NBI) na mabubuksan sa Pebrero ang Chinese desk na tatauhan din ng counterparts nito mula China bilang bahagi ng mga pagsisikap na masolusyunan ang tumataas na bilang ng mga krimen sa Pilipinas na kinasasangkutan ng Chinese nationals.
Tiniyak ni NBI spokesman at Deputy Director Ferdinand Lavin na tinutugunan ng pamahalaan ang dumaraming Chinese-related crimes sa bansa dahil sa pagdami ng Chinese nationals.
“We hope to have a lower crime rate when that is operational,” anang spokesman kaugnay sa paglilikha ng Chinese desk sa NBI.
Habang ikinokonsidera pa ng Philippine National Police (PNP) ang paglikha ng Chinese desk, umaasa naman si Lavin na ang Chinese desk ng NBI ay magiging operational sa first quarter ng taon.
“We will have this operationalized hopefully around February after the Chinese New Year,” aniya.
Sinabi ng spokesman na hiniling ng Chinese government ang paglikha ng Chinese desk nang makipag-ugnayan ito sa NBI noong Disyembre.
“They intend to put a desk or a post at the NBI manned by a Chinese representative from their government and work with our agents for profiling and sharing of information,” aniya.
“The Chinese government fears that there is already the presence of the Chinese mafia in all of these things,” sabi pa.
Tiniyak ni Lavin na hindi malalabag ang sovereignty ng bansa sakaling maglagay ang Chinese government ng mga kinatawan nito sa NBI.
Sinigurado ng Deputy Director na ang Chinese government ay hindi makapagsagawa ng mga operasyon laban sa mga kriminal sa Pilipinas dahil ang bansa ay hindi sakop ng jurisdiction nito.
“I do not see any issue of sovereignty,” ani Lavin.
“At best they can be observers during actual operation,” dagdag niya.