CHINESE, BAN SA PH
Gov’t naalarma vs nCoV
Isang araw matapos magpahayag ng kanyang pag-aalinlangan, sa wakas ay naglabas si Pangulong Rodrigo Duterte ng travel ban sa Chinese nationals na nagmumula sa Hubei, China at iba pang lugar sa bansa kung saan kumakalat ang nakamamatay na 2019 novel coronavirus (2019-nCoV).
Inanunsiyo ito ng Malacañang kinaumagahan matapos kumpirmahin ng Department of Health (DOH) ang unang kaso ng virus sa bansa.
Sa isang pahayag kahapon, sinabi ni Presidential Spokesman Salvador Panelo na naglabas si Duterte ng travel ban order sa rekomendasyon ni Health Secretary Francisco Duque III at ng kanyang long-time aide na si Senator Bong Go.
“The President has issued a travel ban to Chinese nationals coming from the Hubei province of China where the nCoV originated, as well in other places in China where there is a spread of the disease,” aniya.
“It will last until the threat is over given that that the safety of our countrymen is foremost in the President’s mind,” dagdag niya.
Sa tawag sa telepono sa mga miyembro ng Malacañang press corps, kinumpirma ni Panelo na ang sakop ng travel ban ay ia-update sa oras na matukoy ng Chinese government o ng World Health Organization (WHO) ang iba pang mga lugar kung saan may mga kumpirmadong kaso ng virus.
“Sa ngayon sa Hubei. Yun pa lang ang alam natin, eh. Wala pang sinasabi,” aniya.
“Kung meron silang sinabi na, halimbawa sinabi nila na sa Shanghai meron, ‘di hindi na rin natin tatanggapin galing sa Shanghai,” dagdag niya.
Sinabi pa ni Panelo na inatasan na rin ni Duterte ang DOH na simulan ang inihandang protocols para maiwasan ang pagkalat ng misteryosong sakit.
“This raises a serious concern by the Administration on the health and safety of our countrymen. The DOH has been instructed by the President to commence the protocols it has prepared for such an eventuality to contain the disease and neutralize its transmission and spread,” aniya.
Nitong unang bahagi ng linggo, sinabi ni Duterte na wala siyang balak na limitahan ang pagpasok ng Chinese nationals sa Pilipinas, sinabing hindi ito magiging patas dahil ang ibang bansa ay mayroon ding mga kumpirmadong kaso ng virus. Ikinagalit ng netizens ang mga pahayag ng Pangulo lalo na matapos kumpirmahin ng DOH ang unang kaso ng virus sa bansa, sinabi na panahon na para ipagbawal ng gobyerno ang pagpasok ng Chinese nationals sa Pilipinas.
ISOLATED
Ayon sa DOH, ang babaeng Chinese na nahawaan ng kinatatakutang sakit ay nagmula sa Wuhan, lumipad pa-Hong Kong, at sunod sa Cebu, at sa Dumaguete bago dumating sa Manila. Kasalukuyan siyang nakaratay sa San Lazaro Hospital.
Sinabi ni Panelo na ayon kay Duque ang pasyente ay nilulunasan at isolate o nakahiwalay at walang paraan para maisalin niya ang sakit sa isa pang tao.
“The hospital personnel are protectively dressed and their mouths and noses covered with surgical masks plus their hands covered with globes,” aniya.
“The DOH assures us that every measure is being undertaken to contain the spread of the dreadful virus as well as monitoring and placing in quarantine those showing of symptoms of having nCov,” dagdag niya.
PREVENTIVE MEASURES Samantala, pinaalalahanan ng opisyal ng Palasyo ang mga Pilipino na sundin ang payo ng DOH na mag-obserba ng personal hygiene bilang preventive measure. Kabilang dito ang tamang paghugas ng kamay, proper coughing etiquette, pag-inom ng maraming tubig, lutuing mabuti ang pagkain, at kaagad na magpakonsulta kapag nakaranas ng mga sintomas ng virus.