Mundo, balot ng pangamba dahil sa nCov

NABABALOT ngayon ng pangamba ang maraming bansa sa mundo dahil sa pagsulpot ng bagong uri ng sakit, ang tinatawag na novel Corona Virus (nCov), na nagsimula sa Wuhan City, Hubei, China. Sa ngayon, ayon sa ulat, may 11 bansa na ang apektado ng nCov. Mabuti na lang ang Pilipinas ay ligtas pa habang sinusulat ko ito sa impeksiyon ng sakit.

Sa report, may 132 na ang namamatay sa bagong viral disease na ito at libu-libo ang apektado. Naghanda na ang United States at iba pang mga bansa na ilikas ang kanilang mga kababayan mula sa Wuhan City na itinuturing na episentro ng nakahahawang karamdaman.

Maging si Chinese Pres. Xi Jinping ay nagpahayag ng pagkabahala sa paglaganap ng nCov at nagpalaan ng $9 bilyon para sugpuin ito. Bukod sa US, magpapadala rin ang Japan at South Korea ng mga eroplano sa Wuhan para iligas ang kanilang mga mamamayan. Ang Pilipinas ay magpapadala ng chartered planes sa evacuation ng mga Pinoy na nagtatrabaho sa Wuhan at sa ibang panig ng Hubei province.

oOo

Sa kauna-unahang pagkakataon sa kasaysayan ng Philippine Navy (PN), isang babae ang hinirang bilang Commodore. Ang Commodore ay katumbas ng Brigadier General sa Armed Forces of the Philippines (AFP). Samakatwid, nakapapantay na ang mga babaing opisyal sa kalalakihan sa AFP.

Tinanggap ni Capt. Luzviminda Camacho ang unang estrelya noong Martes sa Camp Aguinaldo (donning ceremony) na kung saan ay nagsilbi siya bilang hepe ng AFP-Office of Legislative Affairs (AFP-OLA). “Siya ay nakagawa ng kasaysayan bilang unang female

Commodore sa Philippine Navy,” pahayag ni Capt. Jonathan Zara, AFP Public Office chief. Si AFP chief of staff Gen. Felimon Santos ang naglagay ng estrelya sa balikat ni Commodore Camacho.

Si Camacho na pumasok sa serbisyo sa pamamagitan ng Navy Officers Candidate Course (OCS) ang unang female officer sa Navy na nag-command ng isang navy warship, kasunod ng serye ng mga tungkulin sa karagatan, kabilang ang paglilingkod bilang engineering officer ng isang naval gunboat.

Siya rin ang unang female commander ng contingent ng Filipino peacekeepers na ipinadala ng gobyerno ng Pilipinas sa Haiti. Sa pagkakahirang kay Camacho bilang isang Commodore, marahil ay may katwiran ang mga DDS o die-hard supporters ni Pres. Rodigo Roa Duterte na sabihing hindi isang misognyist (galit sa mga babae) ang ating Pangulo.

Hinirang ni PRRD ang pinsan ng kanyang partner na si Honeylet Avancena bilang Assistant Secretary ng Department of Human Settlements and Urban Development (DHSUD). Siya ay si Melissa Avancena Aradanas.

Kung natatandaan pa ninyo, si Aradanas ay isa sa mga opisyal ng Presidential Commission on Urban Poor (PCUP) na sinibak ng Pangulo noong Disyembre 2017 dahil umano sa “unnecessary foreign trips.” Siya ay hinirang bilang Deputy Secretary General ng Housing and Urban Development Coordinating Council tatlong buwan pagkatapos.

Ipinagtanggol ng noon ay presidential spokesman Harry Roque ang reappointment ni Aradanas sa pagsasabing “walang sino mang makakukuwestiyon sa taglay na kapangyarihan ng Pangulo na humirang ng kanit sino.” Samakatwid, patunay rin ang paghirang ni Mano Digong sa isang babae na gaya ni Aradanas, na hindi siya isang misogynist.