Pista ng Nuestra Senora dela Candelaria

IPINAGDIRIWANG ngayong araw, Pebrero 2, ng mga deboto ng Our Lady of Candles (Nuestra Senora dela Candelaria) sa Jaro Metropolitan Cathedral sa Iloilo City ang pista ng patron ng Western Visayas at Jaro, Iloilo.

Kabilang sa aktibidad ng pista ang tradisyunal na pagbabasbas sa mga kandila, na iniuuwi ng mga deboto at bisita, tulad ng nakaugalian tuwing Linggo ng Palaspas o Palm Sunday, sa paniniwalang ang nabasbasang mga kandila ay magbibigay ng proteksyon sa kanila laban sa kasamaan, pinsala at kamalasan, isasabay ito sa pagdiriwang ng misa at ng prusisyon.

Kabilang naman sa iba pang aktibidad na inaasahan ang Jaro carnival, kung saan kinokoronahan ang reyna ng pista, agroindustrial fair, concerts, exhibits, garden show, at grand cock derby.

Taong 1981 ng kilalanin at koronahan ni Saint John Paul II ang milagrosong imahe ng Our Lady of Candles sa kanyang unang pagbisita sa bansa. Nakalagak ito ngayon sa Jaro Metropolitan Cathedral na idineklarang national shrine kasabay ng pagdiriwang ng Pista ng Nuestra Senora dela Candelaria noong 2012.

Ayon sa mga kuwento, ang imahe ng Birheng Maria, dala ang Infant Jesus sa kanyang kanan braso at isang berdeng kandila sa magkabilang kamay, ay natagpuan ng mga mangingisda sa riverbank sa Iloilo noong 1587. Kalaunan ay inilagay ito sa maliit na simbahan sa jaro at inilipat sa Jaro Cathedral noong 1864.

Samantala, tradisyunal na bumibisita ang mga deboto ng Our Lady of Candles sa Metro Manila sa imahe nito na nakalagak sa Presentation of the Child Jesus Parish sa BF Homes, Paranaque City at sa San Fernando de Dilao Parish sa Paco, Manila.

Kasabay naman ng pagdiriwang ng pista ngayong araw ang paggunita sa Solemnity of the Presentation of the Lord. Kilala rin bilang Candlemas Day, maraming Simbahan ng Kotoliko ang magdaraos ngayong araw ng tradisyunal na prusisyon ng mga binindisyunang mga kandila upang paalalahanan ang mga mananampalataya na “Jesus is the Light of the world, who, by His birth, saved the human race from eternal damnation and expelled the darkness of evil and death.”