Meralco, may 1-week power interruption
Nagpaabisong muli ang Manila Electric Company (Meralco) na magpapatupad sila ng pansamantalang power interruption sa ilang lugar sa Metro Manila at mga karatig-lalawigan ngayong linggong ito bunsod ng mga pagkukumpuni na kanilang isasagawa.
Sa maintenance schedule na inisyu ng Meralco, nabatid na isasagawa ang maintenance works mula ngayong Pebrero 3, Lunes, at magtatagal hanggang sa Linggo, Pebrero 9, na magreresulta sa pansamantalang pagkawala ng suplay ng kuryente.
Ayon sa Meralco, sa Pebrero 3 at 4, kabilang sa mga apektadong lugar ang Palanan sa Makati, dahil sa replacement of pole at line reconductoring works sa Calatagan Street; gayundin ang Dasmariñas City; Imus at General Trias sa Cavite dahil naman sa preventive maintenance at testing works sa loob ng Meralco -Abubot substation; at ang Meycauayan City at Valenzuela City sa Bulacan, dahil naman sa pag-upgrade ng mga pasilidad sa B. Rosales Street sa Barangay Tugatog.
Sa Pebrero 4 at 5 naman, makakaranas ng pansamantalang pagkawala ng suplay ng kuryente ang
Naic, sa Cavite dahil sa replacement ng mga poste at line reconductoring works na apektado ng DPWH project sa Governor’s Drive sa Barangay Ibayong Silangan, at maging ang Matandang Balara sa Quezon City na may mga pasilidad naman na kailangang kumpunihin sa Don Mariano Marcos Avenue (Commonwealth Ave.).
Sa Pebrero 6, magkakaroon naman ng reconductoring ng primary lines at replacement of poles sa loob ng Villa Verde Homes, Barangay Sta. Monica, Novaliches at pagkukumpuni ng mga pasilidad sa Don Mariano Marcos Avenue (Commonwealth Avenue) sa Barangay Payatas, kapwa sa Quezon City habang sa Magallanes naman sa Cavite ay mayroong reconstruction, relocation at replacement of facilities; at line reconductoring works sa Sitio Pulo, Barangay Cabulusan habang sa Western Bicutan, Taguig City naman ay mayroong replacement of pole at instalasyon ng mga karagdagang lightning protection devices sa AFPOVAI Subd. sa Phase 5.
Sa Pebrero 7, apektadong muli ng power interruption ang Quezon City dahil sa line reconstruction works sa E. Rodriguez Jr. Avenue sa Barangay Ugong Norte, Quezon City, gayundin ang Cavite, dahil naman sa preventive maintenance at testing works sa loob ng Meralco – Abubot substation.
Sa Bulacan naman, mayroon ring preventive maintenance at testing works sa Meralco - Angat substation sa Pebrero 7 pa rin.
Sa Pebrero 8 at 9 naman, apektadong muli ang Dasmariñas City dahil sa paglilinis at paghuhugas ng mga pasilidad na naapektuhan ng pagputok ng Bulkang Taal sa loob ng Meralco – Dasmariñas substation; gayundin ang Barangay Ugong sa Pasig City dahil naman sa commissioning ng bagong primary 34.5kV feeder line sa Ortigas Avenue.
Ang South Triangle sa Quezon City ay apektado rin nang pansamantalang pagkawala ng kuryente sa Pebrero 9 dahil sa line reconstruction works sa Tomas Morato Avenue.
Humihingi ng paumanhin ang Meralco sa mga kostumer nilang maaapektuhan ng power interruption dulot ng kanilang maintenance works at ipinaliwanag na layunin lamang nitong higit pang mapaghusay ang ipinagkakaloob nilang serbisyo sa kanila.