Tapos na ang impeachment; simula na ang kampanya
NGAYONG linggo, marahil sa Miyerkules, matatapos na ang pagdinig ng United States sa kaso ng impeachment kay President Donald Trump, na magpapawalang-bisa sa lahat ng akusasyon sa kanya.
Makalipas ang dalawang buwang mga pagdinig sa House of Representatives, na sinundan ng 18 araw na pagdinig sa Senado, inaasahang maliligtas si Trump mula sa dalawang kaso ng impeachment hinggil sa pag-aabuso ng kapangyarihan at obstruction of Congress sa botohang gaganapin 4:00 ng hapon sa Miyerkules (4 n.u. Huwebes, sa Maynila).
Inaakusahan si Pangulong Trump ng (1) pag-abuso sa kanyang kapangyarihan upang maganunsiyo ang Ukraine ng isang imbestigasyon hinggil sa kaso ng kurapsyon laban sa potensyal nitong kalaban para sa pagkapangulo na si Joe Biden ng Democratic Party at (2) pakikialam sa imbestigasyon ng Kamara nang ipagbawal nito sa mga opisyal ang pagtestigo at paglalabas ng mga opisyal na dokumento.
Nitong nakaraang Biyernes, bumoto ang Senado kontra sa paglabas ng bagong witness para sa pagdinig—51 Republicans laban sa 45 Democrats na sinamahan pa ng dalawang independent at dalawang Republicans. Dahil sa naging pagkontra sa witness, idaraos na sa Miyerkules ang pinal na botohan para sa kaso.
Ang pagpapawalang-sala ng Senado na kontrolado ng Republican Party, ay inaasahan na kasasapitan ng kaso ; ito na ang inaasahan sa simula pa lamang. Dahil ito naman ang proseso ng impeachment, proseso na bahagi rin ng sistema ng ating pamahalaan dito sa Pilipinas. Karaniwang pinalulusot ng politikal na partido ang kanilang miyembro na nakaupo sa White House sa mga desisyon at aksiyon nito bilang pangulo.
Hindi naniniwala ang Republicans sa mga akusasyon, kahit totoo man ito, at sapat para tanggalin si President Trump. Ang desisyong ito ay nakasalalay na lamang ngayon sa mga botante ng Amerika na boboto sa pambansang halalan siyam na buwan mula ngayon, sa Nobyembre.
Isa lamang ang kaso ng impeachment sa ilang mga isyu na maaari pang lumitaw bago ang Nobyembre. Pagbabasehan din ng mga botante ang magiging desisyon at aksiyon ni Trump, tulad sa trade war na kanyang sinimulan sa China dalawang taon na ang nakararaan, ang kanyang mga polisiya laban sa imigrasyon at ang kanyang pagkiling laban sa mga Latinos at iba pang lahi, ang kanyang oposisyon sa mga European leader para sa hindi, aniya patas na pakikibahagi sa gastos ng Western sa depensa, at ang kanyang pagiging malapit kay Russian Leader Vladimir Putin sa harap ng natuklasan ng American intelligence sa pagkikialam ng Russia sa nakalipas na dalawang halalan ng US.
Matatapos na ang impeachment habang magsisimula naman ang kampanya para sa halalan sa Nobyembre. Nasa apat na milyong mga Pilipino ang naninirahan ngayon sa US, marami ang dual citizen, na karamihan ay nasa California at Nevada, sa Hawaii, New York, at Illinois.
Tututukan din ng mundo ang halalan ng US, lalo’t ito ngayon ang itinuturing na biggest economy sa mundo at ang nag-iisang world superpower. Anuman ang mangyari sa US ay tiyak na makaaapekto sa mundo. Gayunman, ang interes natin sa impeachment ni Pangulong Trump ay magtatapos na—kasama ng inaaasahang paglilinis kay Presidente Trump—sa Miyerkules ngayong linggo.