Mas pinalawak na scholarship program para sa mga Pilipino
HIGIT pang pinalawak ng pamahalaan ng France ang kanilang scholarship program ngayong 2020 sa pakikipagtulungan sa Department of Science and Technology’s Science Education Institute (DOST-SEI) para sa mga Pilipinong propesyunal na nais magpatuloy ng kanilang master’s degree at doctorate abroad.
Target ng PhilFrance-DOST Scholarship program ang mga Pilipinong nagtatrabaho sa akademya, pananaliksik, o sa institusyon ng pamahalaan upang mapalakas at mapaunlad ang pagpapalitan ng siyentipikong kaalaman at kasanayan sa pagitan ng Paris at Manila.
Sa anunsiyo nitong Biyernes, sinabi ng French Embassy sa Manila, na prayoridad ng programa ang mga sumusunod na larangan: agriculture, biological sciences, climate change, forestry, health and medical research, material sciences, natural resources and environment, nuclear application on health, at veterinary sciences.
Ang mga mabibigyan ng scholarship ay makakatanggap ng partial tuition subsidy, isang round-trip ticket mula Manila patungong France, exemption mula sa visa application fees, monthly allowance, health care package, and priority access sa public student accommodations para sa inaasahang tagal ng pag-aaral.
Hanggang sa Marso 16 pwedeng magbigay ng aplikasyon. At para sa mga detalye at gabay sa eligibility, benefits, and requirements maaaring bisitahin ang PhilFrance Scholarships Program website sa www.philfrance-scholarships. com.
Hinihikayat naman ng embahada ang mga Pilipino na mag-applay para sa iba pang PhilFrance Scholarships na para sa mga Pilipinong mag-aaral at propesyunal na nais magpatuloy ng kanilang pag-aaral sa France.
Mula 2016, nasa higit 50 Pilipino na ang nabigyan ng PhilFrance Scholarship, na nakatulong upang makapag-aral at makapagtapos ng graduate degrees sa French language and literature, business, public policy and international development, engineering, mathematics, marine biology, applied chemistry, environmental and ecological sciences, at public health.