Ilang positibong pagtataya sa coronavirus mula sa WHO
SA panahong araw-araw nating naririnig at nababasa ang mga balita tungkol sa bagong coronavirus, mabuting mapakinggan ang pahayag ng World Health Organization (WHO) representative sa Pilipinas sa naging pagdinig ng Senate Committee n Health nitong nakaraang linggo na inaasahang ngayong buwan mararanasan ang pinakamatinding pagkalat ng virus at unti-unti na itong huhupa.
Sinabi ni WHO representative in the Philippines Rabindra Abeyasinghe na nakikitaan ng pagbaba sa kaso ng pagkamatay sa sakit mula 3 hanggang 2 porsiyento, isang indikasyon ng matagumpay na pagsisikap ng mga hospital sa China at sa buong mundo na matutukan ang sakit.
Sa buong mundo, aniya, may nasa higit 24,300 laboratory-comfirmed cases ng impeksyon hanggang nitong Martes, na may 490 bilang ng namatay, lahat sa mainland China, maliban sa isang naitala sa Pilipinas at isa rin sa Hong Kong. Nasa 20 iba pang bansa ang nag-ulat ng kanilang mga kaso na mabilis ding sumailalim sa quarantine.
Magpapatuloy pa ang sitwasyong ito, aniya, bagamat inaasahan na ng WHO Emergency Committee, na sa tulong ng prevention at control measure na inilalatag ng China at ng iba pang mga bansa, maaaring kontrolin ang sakit.
Patuloy tayong binabagabag ng pangamba hinggil sa coronavirus, dahil nakatakda nang umuwi sa mga susunod na araw ang mga Pilipino na galing ng China. Nasa 42 sa kanila, ang mula sa probinsiya ng Hubei, kung saan matatagpuan ang Wuhan, na sentro ng virus, at handa na ang lahat para sa dalawang linggo na pag-quarantine sa Fort Magsaysay sa Nueva Ecija.
Nagpalabas na ang Department of Health ng protocol para sa iba pang mga Pilipino na magbabalik sa bansa. Bukod sa Fort Magsaysay, mayroon pang gagamitin na dalawang bagong gusali sa Clark City, na itinayo para sa katatapos lamang na Southeast Asian Games.
Mas nakababahala naman ang kaso ng nasa 270 pasahero ng eroplano na nakasabay sa tatlong biyahe ng magkasintahang Chinese mula Wuhan, lumapag sa Cebu, lumipad patungo ng Dumaguete, at patungo sa Maynila. Lima sa 331 pasahero ang mabilis na nahanap habang tumulong na ang Philippine National Police upang mahanap ang nasa higit 270 pang pasahero.
Nagbigay naman si Pangulong Duterte ng personal na aksiyon sa banta ng coronovirus, ang pagbibigay ng kautusan sa lahat ng opisyal ng lokal na pamahalaan, partikular ang mga opisyal ng barangay, na sumunod sa panuto na itinakda ng DoH upang masiguro, na lahat ng mga magbabalik na Pilipino mula China ay sasailalim sa quarantine procedure.
Binigyang-diin naman ni WHO representative Abeyasinghe na ang pagkakadiskubre ng mas maraming kaso ay isang positibong pagbabago, dahil nagpapakita ito sa agresibong pagsisikap, partikular ng pamahalaan ng China, upang madiskubre ang kaso ng mga virus na para sa isolation at treatment.
Dapat itong magpahupa sa takot ng mundo, lalo na sa Pilipinas na maraming mamamayan ang nagtatrabaho at naninirahan ngayon sa China, kabilang sa probinsiya ng Hubei at Wuhan City, kung saan nagsimula ang epidemya ng coronavirus.