Rider, sumagasa ng pulis; arestado
MANGALDAN, Pangasinan – Naaresto ang isang rider na sumagasa sa isang pulis na nagbabantay sa isan checkpoint national road ng Barangay Poblacion.
Kulong ang suspek na kinilala ng pulisya na si Gerald Marcial , 21, taga-Bgy. Pogo, ng nabanggit na bayan.
Inaresto si Marcial matapos sagasaan si PCMS Romeo Liwanag, Jr, nakatalaga sa Bgy. Salay ng naturang lugar.
Sa report, habang nakapuwesto sa checkpoint ang grupo ni Liwanag ay napansin nila ang suspek na may kahin-hinalang kilos habang nagmamaneho ng motorsiklo, dakong 10:00 ng gabi.
Tinangkang parahin ng grupo ni Liwanag ngunit sa halip na tumigil ay pinaharurot nito ang kanyang motorsiklo at sinasagasaan ang biktima.
Hinabol ng grupo ni Liwanag ang suspek at nadakip din ito sa Bgy. Pogo.
Idinahilan ni Liwanag, kaya nila pinahihinto si Marcial ay dahil hindi ito nakasuot ng helmet at kahina-hinala pa ang kilos nito.
Nahaharap ang suspek sa kasong kriminal.