Dagdag-Bawas sa Gilas Pilipinas

ISANG linggo bago sumalang sa unang window ng FIBA Asia Cup, patuloy pa rin ang dagdag-bawas sa roster ng Gilas Pilipinas pool.

Pinakahuling nagpaalam na hindi makalalaro si Phoenix guard Matthew Wright.

Kinumpirma ni interim coach Mark Dickel ang pag-urong ni Wright na nabigong magpakita sa ensayo ng Gilas pool mula ng magsimula sila noong nakaraang linggo.

Hindi naman binanggit ni Dickel ang dahilan ni Wright. Gayunman, umaasa siya na muli itong ikukunsidera ng Samahang Basketbol ng Pilipinas (SBP) para sa mga susunod na windows ng qualifiers.

Si Wright ang pinakahuling manlalaro na nagpaalam na hindi puwedeng lumaro sa unang sa unang window ng qualifiers kung saan makakalaban ng Gilas Pilipinas ang Thailand sa Pebrero 20 at ang Indonesia sa Pebrero 23.

Naunang nagpaalam sina Christian Standhardinger, Japeth Aguilar at Mac Belo

Nadagdag naman kamakailan sa pool bilang kapalit ni Aguilar si Justine Chua.

Pinakahuling inimbita upang mag-ensayo sa Gilas pool sina Alaska big men Vic Manuel at Abu Tratter at

Rain or Shine foward Javee Mocon.

Ito ang ikalawang pagkakataon na lalaro si Manuel sa Nationals pagkatapos ng 30th Southeast Asian Games gayundin si Tratter na naglaro naman noong second window ng FIBA World Cup 2019 Asian Qualifiers noong Pebrero 2018 kontra Australia.

Unang pagkakataon naman sa dating San Beda standout na si Mocon na makalaro sa national team.

Samantala, hindi pa rin sumisipot sa ensayo ng Gilas pool sina cadet Justine Baltazar ng La Salle at TnT KaTropa guard Bobby Ray Parks.