Shaina, Barbie, at Isabelle brave and beautiful sa ‘FPJAP’
SA pagdagdag ng bagong mukha sa FPJ’s Ang Probinsyano ay iisa ang tanong ng lahat netizens, ‘hanggang kelan ba ang serye? Aabot pa ba sila?’ Hindi naman lingid sa kaalaman ng lahat na may kinakaharap na problema ngayon ang ABS-CBN tungkol sa renewal ng prangkisa.
Kaya ang lahat ng kababayang Pinoy sa buong mundo ay nagpahayag ng kanilang saloobin tungkol sa Kapamilya network na huwag itong ipasara dahil ang mga programang napapanood nila sa pamamagitan ng TFC lang sila nakakabalita kung ano ang nangyayari sa Pilipinas at sumasaya sila kapag napapanood nila ang mga paborito nilang artista sa mga teleseryeng inaabangan nila.
Isa na ang FPJ’s Ang Probinsyano sa pinakakaabangan ng mga kababayan nating Pinoy na kahit na sinasabi ng iba na nakakasawa na, pero patuloy pa rin nilang pinanonood kasi nga maganda ang takbo ng kuwento, lalo’t inaabangan kung kailan mawawala sa landas ang asawa ng Presidente na si Lily played by Lorna Tolentino.
Anyway, dahil nahihirapang lutasin ng grupo ng Task Force Aguila sa pangunguna ni Cardo Dalisay (Coco Martin) ay kinailangan ang tulong ng tatlong pulis na babae sa pangunguna ni Shaina Magdayao bilang si Police Major Roxanne Opena, Isabelle de Leon as Police Lieutenant Mariel Lazcano at Barbie Imperial bilang Police Lieutenant Camille Villaluna.
Sa episode na umere nitong Martes ay ipinakilala na ang tatlo sa grupo ni Cardo na mainit naman silang tinanggap maliban sa huli na sambakol ang mukha kasi nga may pinagdadaanang problema dahil sa lolo niyang ikinulong sa kasalanang hindi ginawa.
Napansin kaagad ni Roxanne na mainit ang dugo sa kanya ni Cardo kaya curious siyang malaman ang background nito at dahil sa ipinakitang kagaspangan ng ugali ay naisip na baka nga may dahilan bakit nakulong ang lolo nitong si PM Delfin Borja (Jaime Fabregas).
Pero mukhang hindi na magkakasama ang dalawa dahil nagbitaw na sa kanyang tungkulin bilang pulis si Cardo nang patawan siya ng suspension ng hepe nilang si General Hidalgo na ginagampanan ni Rey Malonzo.
Ang posisyong nabakante ni Denise Laurel bilang Police Major Alessandra Romero ang ibinigay kay Shaina.
Samantala, nabanggit ni Lorna kamakailan na hanggang Marso pa siya sa aksyon-serye ni Coco, ang grupo kaya nina Shaina, Isabelle at Barbie ang makakatuklas sa gawain niya at makakalaban niya?
Going back to Shaina, paano niya mapapalambot ang puso ni Cardo? Siya kaya ang bagong pagseselosan ni Yassi Pressman as Alyana?