PAGSASADIWA
Ang babaing ito’y Hentil.— Itinuturo ng Matandang Tipan kung paano pakikitunguhan ang mga banyaga—ng may malasakit at kagandahang-loob. Simple lang naman ang dahilan: minsan na ring naging mga banyaga ang mga Judio.
Lumiliit na ang daigdig dahil sa mga pag-usad sa teknolohiya at bilis at dali ng paglalakbay. Karaniwan na nating nakakasalamuha ang mga taong mula sa iba’t ibang lugar at lahi. At kung tutuusin, lahat naman tayo’y mga banyaga sa “lambak ng luhang” ito. Iisa lamang ang ating totoong tahanan, at iyon ay ang Langit; at iisa lamang ang ating Amang nasa Langit.
Pumarito si Jesus sa ating piling bilang isang banyaga. Ngunit itinuring niyang “kababayan” ang bawat isa sa kabila ng katotohanang siya at ang kanyang mensahe’y nananatiling banyaga para sa ilan hanggang sa wakas. Kaya naman ang kanyang pagsubok o hamon sa atin ay: “Sino nga ba talaga ang totoong nakikipagkapwa-tao?” (bas. Lc 10:36). Para sa isang Kristiyano, walang banyaga.