‘Lockdown’, ipinatutupad sa Sagada vs COVID-19
BAGUIO CITY – Dahil sa patuloy na banta ng 2019 novel coronavirus disease (COVID 19), pansamantang ipinatigil ng municipal government ang anumang eco-tourism activities sa Sagada, Mt. Province, na kilala bilang ‘Hanging Coffin of the North’.
Ang nasabing hakbang ay ipinatutupad alinsunod na rin sa Executive Order No. 07-20 na ipinalabas kahapon (Pebrero 13) ni Mayor James Pooten.
Ang Sagada ay kilalang dinadayo ng mga turista, karamihan ay foreigner dahil sa angking-yaman nito sa kalikasan at makasayasayang ‘Hanging Coffin’ at mummy caves.
Sinabi ni Pooten, ang desisyon ay base sa pakikipagpulong nito sa mga opisyales at health authorities dahil sa patuloy na outbreak ng virus at base na rin sa panawagan ng World Health Organization na ipagbawal muna ang anumang matataong activities upang masiguro ang kaligtasan ng mga residente.
"Mahirap gawin ito, lalo na’t maraming negosyante ang maaapektuhan, pero mas mahalaga na pag-ingatan ang kaligtasan ng mga residente, lalo na’t mas maraming foreign national ang bumibisita sa Sagada,” pahayag ni Pooten.
Kamakailan ay sinuspinde naman ng Kalinga ang kanilang Silver Anniversary at Bodong Festival sa layuning maiwasan ang nasabing virus mula sa mga dadayong turista para na rin sa kapakanan ng mga residente.