May demokrasya sa PH
MAY mga nagtatanong kung may demokrasya sa Pilipinas at ito ay maituturing pang isang demokratikong bansa. Bakit kaya ito naitanong ng ating mga kababayan? Dahil kaya ito sa panganib na magsara ang higanteng TV network na ABS-CBN (na habang sinusulat ko ito) ay hindi pa naikakalendaryo sa Kamara ang pagdinig at pagtalakay sa mahigit na 10 panukalang batas tungkol sa aplikasyon na mairenew ang prangkisa na mapapaso sa Marso 30, 2020?
Binanggit din ng nagtatanong kung pagsupil ito sa kalayaan ng pamamahayag matapos magalit si Pres. Rodrigo Roa Duterte sa ABS-CBN nang hindi inere ang kanyang paid advertisement noong 2016 presidential election at hindi isinoli ang pera sa kanya.
Naghain pa si Solicitor General Jose Calida ng quo warranto petition sa Supreme Court para hindi bigyan ng prangkisa ang TV network ng Lopez family dahil umano sa mga paglabag nito sa batas. Gayunman, mahigpit na itinanggi ni presidential spokesman Salvador Panelo na walang kinalaman si PRRD sa aksiyon ni Calida. Maniniwala kaya rito ang taumbayan Spox Panelo?
Para sa akin umiiral pa rin ang malayang pamamahayag (freedom of press) at malayang paghahayag (freedom of expression) sa Pilipinas sa kabila ng paniniwala ng mga kritiko at kalaban ng ating Pangulo na sinusupil niya ang ganitong mga kalayaan.
Malaya pa tayong nakasusulat, malayang nakapagsasalita, malayang batikusin ang Duterte administration sa madugong giyera nito sa illegal drugs na kumitil ng libu-libong ordinaryong pushers at users. Noong panahon ng diktador na si ex-Pres. Ferdinand E. Marcos, hindi nagagawa ito ng mga Pinoy.
Marahil, ang puwede lang nating isipin ay baka may bahid ng panggigipit ang ginagawa ng administrasyon sa mga kritiko, oposisyon at kalaban nito. Maaaring ginagamit ng administrasyon ang malawak na poder ng Executive Branch kung kaya maging ang mga kasapi ng Lehislatura at Hudikatura ay “nanginginig” sa takot kapag napagbalingan ni
Mano Digong.
Sa lawak, talim at talas ng kapangyarihan ng Ehekutibo, puwede nitong suriin, pabuksan ang mga isyu sa buwis ng mga Mahistrado ng Korte Suprema, ng mga senador, ng mga kongresista. Puwede ring parepaso ng Ehekutibo ang mga ari-arian, kompanya at iba pang assets ng SC Justices, senators, congressmen. Eh, sino ang hindi matatakot? Absuwelto sina Vice Pres. Leni Robredo, mga kandidato ng Otso Diretso, mga obispo sa kasong sedisyon na inihain laban sa kanya. Gayunman, kasama sa kakasuhan ng Dept. of Justice sina ex-Sen. Antonio Trillanes, ilang pari at ang whistleblower na si ...
Alyas Bikoy na nagpalabas bago ang halalan ng tinatawag na “Ang Tunay na Narco-list.”
Sabi nga ng kaibigan kong palabiro-sarkastiko-pilosopo: “Humanda ka na Trillanes, tiyak na ang bigat at poder ng gobyerno ay idadagan sa iyo sa pagiging kritiko ng Pangulo. Baka isunod ka kay Sen. De Lima na nakabilanggo ngayon courtesy ng mga testigo na pawang convicted felon at drug lords sa New Bilibid Prisons.”
Isipin ninyong ang mga sumaksi laban kay De Lima ay drug lords, felons na nawalan ng integridad at sinseridad dahil sila ay convicted o napatunayang nagkasala at lumabag sa mga batas ng bansa. Tingnan natin kung ano ang magiging hakbang ni Trillanes ngayong siya ay hindi na senador. Sabi nga nila, sanay naman siyang mabilanggo nang matagalan.