Kamara kinalampag sa ABS-CBN franchise: Kilos na!

Pinuna kahapon ng mga kongresista ang ipinapalagay na plano ng liderato ng Kamara na hayaang pumaso ang prangkisa ng broadcast giant na ABS-CBN bago kumilos sa nakabinbin na mga panukalang batas upang mai-renew ang prangkisa para sa isa pang 25 taon.

“We cannot just wash our hands of the bill. That would be tantamount to Congress renouncing its exclusive power to grant legislative franchises,” saad sa pahayag ni Buhay Party-List Rep. Lito Atienza.

Ayon sa kanya, ang lahat ng 302 miyembro ng House of Representative ay dapat na bigyan ng pagkakataon na bumoto sa franchise renewal bills kaugnay network na pag-aari ng mga Lopez.

Magpapaso ang prangkisa ng ABS-CBN sa Marso 30 ngayong taon, at mayroon lamang hanggang Marso 11 ang Komite upang kumilos sa mga nakabinbing hakbang dahil ang Kongreso magkakaroon ng summer recess pagkatapos nito. Mayroong 11,000 empleyado ang network.

Ang lahat ng mga mata ay nakatutok sa Committee on Legislative Franchises na pinamumunuan ni Palawan 1st district Rep. Franz Alvarez, dahil sandosena o higit pang mga panukalang batas na naglalayong i-renew ang franchise ay ini-refer sa panel. Sa ngayon, hindi ito nagkalendaryo ng isang pagdinig para sa partikular na mga panukalang batas.

Ibinasura ni Atienza ang “pipedream” na pahayag ng ilan nilang mga kasamahan na maaaring mag-operate ang ABS-CBN hanggang Marso 2022 kahit walang franchise basta’t makakuha ng two-year provisional authority mula sa National Telecommunications Commission (NTC).

“That is a fantasy. The NTC will simply say we cannot possibly give you a provisional authority because the chief lawyer of the Republic wants to shut you down,” ani Atienza, na ang tinutukoy ay ang quo warranto petition ni Solicitor General Jose Calida sa Supreme Court (SC) para bawiin ang umiiral na prangkisa ng ABS-CBN.

Sinabi ni Magdalo Party-List Rep. Manuel Cabochan III na ngayon na ang oras para aksiyunan ang nakabinbing mga hakbang para sa ABS-CBN.

“Why let the franchise effectivity lapse bago bigyan ng pansin?” diin ni Cabochan.

Sinabi ni House Speaker Alan Peter Cayetano nitong weekend na maaaring simulan ng kapulungan ang pagtalakay sa franchise renewal bills sa Mayo pagkatapos ng summer recess, o sa Hulyo, matapos ang paghahatid pagbibigay ni Pangulong Rodrigo Duterte ng kanyang taunang State of the Nation Address (SONA).