Adjudication process vs narco cops, larga na
Nagsimula ang evaluation at adjudication process ng Philippine National Police (PNP) sa mga pulis na isinasangkot sa kalakaran sa ilegal na droga.
Tiniyak ng PNP na magiging patas at walang whitewash sa proseso ng pagsala sa pangalan ng mga pulis na pasok sa drug watchlist, ngayong nagsimula na ang kanilang ginagawang evaluation at adjudication process.
Sinabi ni PNP Spokesman Brig. Gen. Bernard Banac na bibigyan ng due process ang lahat ng 357 pulis kaya’t ituturing silang mga inosente hangga’t hindi napapatunayang guilty.
Ayon pa kay Banac, nais nilang lumabas ang katotohanan sa imbestigasyon kaya kung wala naman talagang pagkakasangkot sa iligal na droga ang pulis na nasa watchlist ay wala itong dapat ikabahala.
Isang buwan ang ibinigay na palugit ni PNP chief Gen. Archie Gamboa sa adjudication board para tapusin ang pagsasala sa listahan.
Ayon sa talaan ng mga pulis na isinangkot sa illegal drug trade, 15 na ang kumuha ng early retirement habang 43 ang idineklarang AWOL.
CREDIBLE LIST
Iginiit naman ng Malacañang na credible pa rin ang listahan ng narcocops na isinapubliko kamakailan ng PNP at ng Department of the Interior and Local Government (DILG) sa kabila ng pagkuwestiyon ni Pangulong Rodrigo Duterte sa pagkakasama kay Police Col. Jovie Espenido.
Ayon kay Presidential Spokesman Atty. Salvador Panelo, laging ang presumption ay credible ang listahan maliban na lang kung may ilalabas na ebidensiya ang isinasangkot na ito ay sinisiraan lamang.
Ayon kay Panelo, malaya naman ang DILG at PNP na i-validate ang pagkakasama ni Espenido sa naturang listahan.
Kung may maipe-presentang patunay na sangkot umano si Espenido sa kalakaran ng iligal na droga ay siguradong magbabago ang posisyon ng Pangulo sa usaping ito.
Subalit sa ngayon, sinabi ng kalihim na naniniwala si Pangulong Duterte na ‘black propaganda’ lamang ang pagkakasama ni Espenido sa narco-cops list para sirain ang reputasyon nito.
Naging kontrobersiyal si Espenido matapos pangunahan ang madudugong drug operation na ikinamatay ni Albuera Leyte Mayor Rolando Espinosa noong 2016 at Ozamiz City Mayor Reynaldo Parojinog at 14 na iba pa noong 2017.