Ang mga OFW sa balita dito at sa buong mundo
NAGING laman ng mga balita kamakailan ang Overseas Filipino Workers (OFWs) sa buong mundo dahil sa iba’t ibang dahilan.
Kabilang sila sa maraming tao na sakay ng cruise ship na Diamond Princess na isinailalim sa quarantine sa Yokohama, Japan, dahil sa napakaraming kaso ng coronavirus sakay nito.
Sa huling bilang, 35 Pilipino, marami sa kanila ay crew member, ay nasa ilalim ng pangangalagang medikal. Sa Hong Kong, nakumpirma na isang kasambahay na Pinay ang mayroong virus at isinmailalim sa quarantine at pangangalagang medical.
Libu-libong OFW ang pinagbawalan na umalis sa bansa upang bumalik sa kanilang mga lugar ng trabaho sa Hong Kong at Macau, China, ngunit sa paghina ng epidemya ng coronavirus, inalis ang travel ban noong Martes. Ilang araw na ang nakaraan, inalis rin ang pagbabawal para sa mga Pilipinong na patungong Taiwan.
Ang mga ulat ng maraming mga Pilipino sa ibang bansa ang nahawaan ng coronavirus marahil ay hindi maiiwasan sapagkat kung saan man mapunta ang isa sa buong mundo ngayon, mayroong mga OFW. Patuloy silang umaalis araw-araw upang magtrabaho sa napakaraming mga bansa sa buong mundo kung saan sila pinahahalagahan bilang mga doktor at nars, inhinyero at manggagawa sa konstruksyon, mga guro at eksperto sa teknolohiya ng impormasyon, mga seamen na nakasakay sa mga barko ng iba’t ibang mga bansa sa dagat, at bilang mga manggagawa sa bahay.
Ang kanilang mga padalang remittances nagsisilbi upang mapanatili ang kanilang mga pamilya at makapag-aral ang kanilang mga anak, habang nagsisilbing pampalakas sa Gross Domestic Product (GDP) ng bansa.
Ang OFW remittances na ito ay pumalo sa all-time high na $33.5 bilyon noong 2019, iniulat ng Bangko Sentral ng Pilipinas nitong Lunes. Ito ay 3.9 porsiyentong mas mataas kaysa $32.2 bilyon na ipinadala ng OFWs sa sinundang taon. Pinakamalaking remittances noong 2019 ay nagmula sa United States, sinusundan ng Saudi Arabia, Singapore, Japan, United Arab Emirates, United Kingdom, Canada, Hong Kong, Germany, at Kuwait – isang indikasyon sa kung saan nakatira at nagtatrabaho ang karamihan ng OFWs sa kasalukuyan.
Naging laman din ng balita ang ating nitong linggo sa isa pang dahilan – nais ng Commission on Elections (Comelec) na mairehistro ang mahigit 2 milyon para makaboto sa national elections sa Mayo, 2022. Sinabi ni Comelec Commissioner Rowena Guanzon na isasaalang-alang ng Comelec ang panukala para sa pagtaas ng mobile registration upang maabot ang mas maraming mga botanteng Pilipino sa ibang bansa. Ang Comelec ay mayroon nang halos 1.3 milyong mga botante sa ibang bansa sa mga listahan nito, at tinitingnan ang 2 milyon na hindi pa nakalista, sinabi niya.
Tunay nga na ang mga Pilipino ay naging malaking parte ng buhay sa maraming bansa sa buong mundo, sa kanilang mga kasanayan bilang mga propesyonal sa maraming larangan na nag-aambag sa paglago ng ekonomiya ng mga bansang ito.
Kinilala sila sa kanilang kakayahan sa kanilang mga larangan at sa pakikitungo sa ibang tao, sa tulong kanilang kakayahang magsalita ng English, ang wikang internasyonal ngayon.
Isinusulong ng gobyerno ng Pilipinas sa ngayon na magsagawa ng mga programa na magkakaloob ng mas maraming trabaho para sa mga Pilipino, kabilang na ang massive construction program ng”Build, Build, Build,” na na magpapalawak ng aktibidad sa komersyo sa maraming bahagi ng bansa. Makatutulong ito para magbigay ng lokal na trabaho sa mas maraming Pilipino, ngunit inaasahan natin na mananatili ang OFWs na isang mahalagang bahagi ng buhay pang-ekonomiya ng maraming mga bansa dahil sa kanilang kakayahan at kasanayan bilang mga manggagawa at ang kanilang kakayahang magtrabaho nang maayos sa ibang mga tao sa buong mundo.