2 parak, asset, naisahan ng ‘basag kotse’

Hindi nakaligtas ang sasakyan ng mga awtoridad sa mga miyembro ng “basag kotse,” saan natangay ng mga ito ang baril at pera ng mga parak, matapos pagnakawan at basagin ang salamin ng kanilang service vehicle sa Malabon City, Biyernes ng gabi.

Nakuha ng mga hindi pa nakikilalang mga kawatan ang IHK 416 Assault Rifle Cal. 5.56 MMX 45 (serial no. 88-042685) na may 30 rounds metal magazine ni PSMS Regune Paule, 43, nakatalaga sa Station Intelligence Branch (SIB) ng Malabon Police, nakatira sa No. 1412 MRH Building 1, A. Reyes Street, Barangay Baritan ng nasabing lungsod.

Natangay rin ang sling bag na may lamang P2,000 cash ng driver na si Ariston Arceo, nasa hustong gulang, naninirahan sa No. 307 M. H. Del Pilar, Barangay Maysilo, Malabon City.

Sa imbestigasyon ni PSSG Jose Romeo A, Germinal ng Station Investigation Unit (SIU), sakay ng Mitsubishi L300 sina PSMS Paule kasama si PCPL. Krisner Buendia, saan si Arceo ang driver, kasama rin ang kanilang asset, bandang alas 11:30 ng gabi.

May dala umano silang warrant of arrest para arestuhin ang isang wanted person at ayon sa kanilang asset naroroon ang kanilang target sa Governor Pascual corner Sitio Gulayan Street, Bgy. Catmon, Malabon City.

Sina PSMS Paule at PCPL. Buendia ang bumaba sa sasakyan upang pasukin ang eskinitang kinaroronan ng kanilang huhulihin, habang naiwan sa sasakyan ang informant at si Arceo.

Sumakit ang tiyan ng driver at naghanap ito ng lugar para magbawas at iniwan ang kasamang asset, pero pagbalik, basag na ang salamin ng kanilang sasakyan, wala na baril at ang kanyang sling bag.

Nagtaka si Arceo dahil wala doon ang kasama na pinagbilinan nito nang siya ay umalis.

Ilang minuto ang lumipas, dumating na asset na nagulat nang malaman na nanakawan sila.

Bumili lang daw ng yosi ang impormante at sandali lang niyang iniwan ang sasakyan.

Patuloy ang imbestigasyon sa insidente.