Travel ban sa South Korea, pinag-iisipan
Pinag-aaralan ng pamahalaan ang posibilidad na isama ang South Korea sa pagbabawal nito bilang bahagi ng pagsisikap na makontrol ang pagkalat ng 2019 novel coronavirus disease (COVID-19).
Sinabi ni Justice Secretary Menardo Guevarra na tatalakayin ito ng Interagency Task Force on Emerging Infectious Diseases (IAFT-EID) matapos itaas ng South Korea sa highest alert level na “red” para palakasin ang pagtugon laban sa pagkalat ng sakit.
“That matter may be taken up at the next meeting of the task force on emerging infectious diseases,” sinabi ni Guevarra.
Sa kabilang dako, sinabi ng Kalihim na ang IAFT-EID ay hindi pa nakakapagiskedyul ng susunod na pagpupulong.
Kaugnay nito, pinaalalalahanan ng Department of Foreign Affairs (DFA), sa pamamagitan ng kanyang Embahada ng Pilipinas sa Seoul, ang lahat ng Pilipino sa South Korea na mag-monitor at sumunod sa mga abiso buhat sa South Korean health authorities at makipagtulungan sa mga hakbangin na matigil ang pagkalat ng coronavirus (COVID-19).
Sa oras pangangailangan, maaaring tumawag ang mga Pinoy sa South Korea sa emergency hotline number ng Embahada sa telepono bilang (+82) 109263-8119.
Para naman sa mga Pinoy sa SoKor na nakararanas ng mga sintomas ng COVID-19 na agad kumontak sa Korea Center for Disease Control and Prevention (KCDC) sa 1339.
Kinumpirma ng Embahada na wala itong natatanggap na impormasyon na may Pinoy sa SoKor na nahawa sa COVID-19.
Sa ngayon, walang travel ban na ipinatutupad para sa Pinoy na bumibiyahe patungong South Korea subalit pinapayuhan ang mga biyahero na ipagpaliban muna ang kanilang biyahe kung hindi naman ito importante bilang bahagi ng kanilang pag-iingat laban sa nasabing sakit.
Ayon sa tala ng DFA noong Hunyo 2019, mayroong 60,139 Pinoy ang naninirahan at nagtatrabaho sa South Korea.
Sinabi ni DFA Assistant Secretary Eduardo Menez na base sa pinakabagong impormasyon mula sa Korea Immigration Service (KIS) na ipinabatid ng Embahada, na 1,681 Pinoy ang nakabase sa Daegu at 2,608 sa North Gyeongsan Province, noong Setyembre 2019. Aniya nasa kabuuang 4,289 Pinoy ang nasa mga aapektadong lugar.