ABS-CBN ’not perfect’ pero nais makapaglingkod: Katigbak
Sinabi kahapon ni ABS-CBN Corporation president and chief executive officer Carlo Katigbak sa Senate public services committee na habang ang negosyo ng network ay nakatuon sa serbisyong pampubliko, inamin nila na hindi sila isang perpektong samahan.
Gayunpaman, sa nakalipas na 25 taon ng prangkisa nito, sinabi ni Katigbak na sinisikap ng ABS-CBN na maihatid ang uri ng serbisyong pampubliko na makabuluhan at mahalaga sa sambayanang Pilipino.
“When Eugenio Lopez Jr. founded ABS-CBN, he decreed that ABS-CBN’s business was to be in public service. That statement led to a clear articulation of our long-standing mission, to be In the Service of the Filipino,” sinabi ni Katigbak sa panel sa pagdinig sa prangkisa ng ABSCBN network.
“Araw araw, lahat po kami sa ABS-CBN ay nagpapasalamat dahil sa pagkakataong magbigay serbisyo sa bawat Pilipino,” sinabi pa niya.
“While our commitment to serve is genuine, we also acknowledge that we are not a perfect organization. Where we have shortcomings, we acknowledge them, and we work to correct them,” ipinunto niya.
Sa kabila ng kanilang mga pagkukulang, sinabi ng ABS-CBN executive na binibigyan nila ng bigat ang kanilang layunin na magbigay serbisyo.
“May pagkukulang man kami, mas matimbang ang aming adhikain na makapaglingkod.
“We would also like to state that we have not broken the law or violated any of the provisions of our franchise,” aniya.
Nagpapasalamat ang ABS-CBN na isinagawa ng Senado ang pagdinig at inanyayahan silang liwanagin ang mga isyu na ibinabato sa kanila, lalo na ni Pangulong Duterte.
“We are grateful for this chance and we are hopeful that our integrity and values as an organization will shine through,” sinabi niya.
Habang umuusad ang pagdinig sa Senado, hanggang ngayon ay hindi pa naikakalendaryo sa Kamara para talakayin ang mga panukalang batas tungkol sa aplikasyon ng ABS-CBN para sa franchise renewal nito.
Sinabi ni Speaker Alan Peter Cayetano na bukod sa isyu ng ABS-CBN, may iba pang mahahalagang panukala ang nasa official business ng House of Representatives kaya inaayos nila ang mga ito.
Ang House committee on legislative franchises na may hurisdiksiyon sa ABSCBN franchise renewal application, ay nag-aatubili hanggang ngayon na ikalendaryo at aksiyunan ang aplikasyon ng giant TV network.